सामग्री खोज्नुहोस्

टोकियो । जापानी अटो कम्पनी होंडा मोटरका कार्यकारी उपप्रमुख तथा निर्देशक शिन्जी आओयामाले ‘अनुचित आचरणको आरोप’ लागेपछि सोमबार राजीनामा दिएका छन्।

कम्पनीले एक विज्ञप्ति जारी गर्दै आओयामामाथि लागेको आरोप कामको समय बाहिर सामाजिक जमघटका क्रममा भएको बताएको छ। तथापि, घटनाको विस्तृत विवरण भने सार्वजनिक गरिएको छैन।

‘मानव अधिकारको सम्मान र उदाहरणीय नेतृत्व’को भूमिकामा रहेका व्यक्तिमाथि यस्तो गम्भीर आरोप लाग्नु कम्पनीका लागि खेदजनक भएको विज्ञप्तिमा उल्लेख छ।

होन्डाको लेखा परीक्षण समितिले घटनाको अनुसन्धान गरी निर्देशकहरूको समितिमा अनुशासनात्मक कार्य योजना पेश गरेको थियो। समितिले आओयामामाथि कारबाहीबारे निर्णय गर्ने तयारी गरिरहँदा उनले अग्रिम रूपमा राजीनामा दिएका हुन्।

होन्डाले आओयामाको राजीनामालाई स्वीकार गर्दै कम्पनीको मूल्य र नैतिकताको उच्च मापदण्डलाई निरन्तरता दिने प्रतिबद्धता जनाएको छ।