सामग्री खोज्नुहोस्

एजेन्सी । टर्कीको पश्चिमी तटमा आप्रवासीहरूको डुङ्गा डुब्न थालेपछि बिहीबार नौ आप्रवासीको मृत्यु भएको छ । अन्य २५ जनालाई उद्धार गरिएको अधिकारीहरूले बताएका छन् ।

यो घटना बिहीबार बिहान अयभासिक जिल्लाको तटमा भएको स्थानीय गभर्नरको कार्यालय र तटरक्षकले बताएका छन् ।

‘खोजी र उद्धार प्रयासको परिणाम स्वरूप नौ शव फेला परेका छन् र २५ जना आप्रवासीलाई उद्धार गरिएको छ’, बेपत्ता एक आप्रवासीको खोजी जारी रहेको उल्लेख गर्दै गभर्नरको कार्यालयले विज्ञप्तिमार्फत जानकारी दिएको छ ।​

आप्रवासीहरूको राष्ट्रियता तत्काल थाहा थिएन ।

सोही दिन ग्रिसको लेस्बोस टापुमा आप्रवासी बोकेको डुङ्गा डुब्दा तीन बालकसहित सात जनाको मृत्यु भएको र २३ जनालाई उद्धार गरिएको ग्रिसको तटरक्षकले जनाएको छ ।

डुङ्गामा लगभग ३० जना थिए र मौसम सामान्य हुँदा टर्कीको तटबाट छोटो दूरीमा पल्टिएको थियो ।

टर्कीको तटरक्षकको एक स्रोतले एएफपीलाई दुई दुर्घटना असम्बन्धित भएको बताएको छ ।

टर्कीको तट र युरोपेली सङ्घ (ईयू) प्रवेश द्वारका रूपमा काम गर्ने नजिकैका ग्रीक द्वीपहरू सामोस, रोड्स र लेस्बोस बीचको छोटो तर खतरनाक मार्गमा जहाज दुर्घटनाहरू धेरै सामान्य छन् ।