सामग्री खोज्नुहोस्

एजेन्सी । मध्य म्यानमारको मान्डलेमा भूकम्पका कारण ध्वस्त भएको एक अपार्टमेन्ट ब्लकको भग्नावशेषभित्र ९० जनाभन्दा बढी मानिस फसेको हुनसक्ने रेडक्रसका एक अधिकारीले शनिबार बताएका छन् ।

शुक्रबार गएको ७.७ म्याग्निच्युडको भूकम्पबाट सबैभन्दा बढी प्रभावित मान्डलेका भवनमध्ये ‘स्काई भिल्ला कन्डोमिनियम डेभलपमेन्ट’ पनि एक हो ।

उक्त भवनको भग्नावशेषबाट ‘नौ जनाको मृत शरीर र ४४ जनालाई जीवितै निकालिएको छ’, घटनास्थलमा रहेका रेडक्रसका एक अधिकारीले नाम नबताउने सर्तमा एएफपीसँग भने ।

उनले थपे, ‘९० जनाभन्दा बढी मानिस भित्र हुन सक्छन् । हामी अझै पनि डाटा सङ्कलन गरिरहेका छौं । हराएका परिवारका सदस्यहरूको खोजी गरिरहेका  छन् र हामीले सूचना सङ्कलन गरिरहेका छौं।’

भूकम्पका कारण म्यानमारमा एक हजारभन्दा बढी मानिसको मृत्यु भएको छ तर सञ्चार सेवा अवरुद्ध भएको छ । विपत्तिको वास्तविक परिमाण बाहिर आउन थालेको छ ।

यो दशकौंपछिको देशको सबैभन्दा ठूलो भूकम्प हो जसमा १७ लाखभन्दा बढी जनसङ्ख्या भएको दोस्रो ठूलो सहर मान्डले नराम्ररी प्रभावित भएको छ ।
 
भूकम्पका कारण स्काई भिल्ला कोन्डोको १२ तल्लामध्ये छ तला मात्र देखिएको छ ।