सामग्री खोज्नुहोस्

काठमाडौं । काठमाडौंको तीनकुनेमा भएको राजावादीको प्रदर्शनमा तोडफोड तथा आगजनीमा संलग्न रहेको आरोपमा प्रहरीले १०५ जनालाई पक्राउ गरेको छ । 

प्रदर्शनलाई अराजक बनाउने, आगजनी र तोडफोड गरेको आरोपमा उनीहरूलाई पक्राउ गरिएको प्रहरीले जनाएको छ । 

पक्राउ पर्नेहरूमा राप्रपाका नेताहरू रवीन्द्र मिश्र, धवलशम्शेर राणा, स्वागत नेपालसहितका अभियन्ताहरू रहेका जिल्ला प्रहरी परिसर, काठमाडौंका प्रवक्ता एसपी अपिलराज बोहराले जानकारी दिए । 

उनका अनुसार राजावादी आन्दोलन समितिका संयोजक नवराज सुवेदीलाई घरमै नजरबन्दमा राखिएको छ । 

आन्दोलनका प्रमुख योजनाकार दुर्गा प्रसाईं भने फरार रहेका छन् । 

यस्तै, काठमाडौंको तीनकुने क्षेत्रमा लगाइएको कर्फ्यु हटाइएको छ ।

जिल्ला प्रशासन कार्यालय काठमाडौंले शनिबार बिहान सूचना जारी गर्दै तीनकुने र आसपासको क्षेत्रमा लगाइएको कर्फ्यु आदेश स्थगन भएको जानकारी दिएको हो । 

शुक्रबार राजावादीहरूको प्रदर्शन उग्र बनेपछि प्रशासनले काठमाडौंको तीनकुनेसहित क्षेत्रमा २ पटक गरेर बिहान ७ बजेसम्मका कर्फ्यु आदेश जारी गरेको थियो ।