सामग्री खोज्नुहोस्

एजेन्सी । दक्षिण कोरियामा लागेको डढेलो हालसम्मकै सबैभन्दा ठूलो भएको छ। यसले अहिलेसम्मकै सबैभन्दा धेरै वन क्षेत्र नष्ट गरेको भन्दै त्यहाँको विपद् व्यवस्थापन प्रमुखले यसलाई इतिहासकै भयावह डढेलो बताएका छन्।  

यो डढेलोका कारण मृत्यु हुनेको संख्या २६ पुगेको छ भने आठ जना गम्भीर घाइते भएका छन्। अरू २२ जनालाई सामान्य चोट लागेको छ।  

गत सप्ताहन्तमा १२ भन्दा बढी स्थानमा डढेलो फैलिएको थियो। यसले दक्षिणपूर्वी क्षेत्रका धेरै भाग जलाएको छ।

करिब २७,००० मानिसलाई तत्काल सुरक्षित स्थानमा सार्नुपरेको थियो। आगलागीका कारण सडक अवरुद्ध हुनुका साथै सञ्चार सेवा बन्द हुँदा स्थानीयवासी भागाभाग गर्न बाध्य भएका थिए।  

विपद् तथा सुरक्षा विभागका प्रमुख ली हान-क्युङका अनुसार डढेलो तीव्र गतिमा फैलिएको छ। यो आगलागीका कारण ३५,८१० हेक्टर वन जलेको छ।

सन् २००० मा पूर्वी तटीय क्षेत्रमा लागेको डढेलोले २५,००० हेक्टर क्षेत्र नष्ट गरेको थियो, जुन हालसम्मकै ठूलो मानिन्थ्यो। अहिलेको आगलागीले त्यसलाई पनि उछिनेको छ।