सामग्री खोज्नुहोस्

एजेन्सी । अमेरिकी राष्ट्रपति डोनाल्ड ट्रम्प र युक्रेनी राष्ट्रपति भोलोदिमिर जेलेन्स्कीबीच ह्वाइट हाउसमा भएको वार्ता चर्काचर्कीमा परिणत भएको छ। ट्रम्पले युक्रेनलाई अमेरिकी सहयोग समाप्त हुने चेतावनी दिएपछि दुबै नेताबीच भनाभन भएको हो।

ओभल अफिसमा भएको वार्तामा दुई नेताले आ-आफ्ना अडान नछाडेपछि चर्काचर्की भएको हो ।

वार्तामा ट्रम्पले जेलेन्स्कीलाई सम्झौता गर्न आग्रह गरे पनि जेलेन्स्कीले असहमति जनाएपछि ट्रम्प आक्रोशित भएका थिए। उनले जेलेन्स्कीलाई तेस्रो विश्वयुद्ध निम्त्याउने जुवा खेलिरहेको आरोप लगाए।  

बैठक युक्रेनको खनिज सम्पदा बाँडफाँट र रुससँग शान्ति सम्झौताबारे छलफल गर्न आयोजना गरिएको थियो। फ्रान्स र बेलायतका नेताहरूले ट्रम्पलाई किएभसँग सहकार्य नछोड्न आग्रह गरेपछि वार्ता तय भएको थियो।  

यद्यपि, कूटनीति आवश्यक रहेको उपराष्ट्रपति जेडी भान्सको भनाइपछि थप तनाव बढ्यो। विवादका कारण अमेरिका र युक्रेनबीच अपेक्षित खनिज सम्झौता सम्पन्न हुन सकेन र जेलेन्स्कीलाई राष्ट्रपति कार्यालयबाट बाहिरिन भनिएको थियो ।

वार्तापछि फक्स न्यूजसँग बोल्दै जेलेन्स्कीले विवाद ‘दुवै पक्षका लागि ठीक नभएको’ बताए तर अमेरिका-युक्रेन सम्बन्ध अझै अगाडि बढ्न सक्ने विश्वास व्यक्त गरे।