सामग्री खोज्नुहोस्

एजेन्सी । गाजामा तेस्रो सामूहिक पोलियो खोप अभियान शुरू भएको छ । शनिबारबाट शुरू भएको अभियानको लक्ष्य प्यालेस्टिनी क्षेत्रभर करिब छ लाख बालबालिकालाई पहिलो मात्रा दिने रहेको छ ।

उत्तरी गाजाको जबालियाको मस्जिदमा १० वर्षमुनिका बालबालिकाले यो खोप लगाएका थिए । त्यहाँ गत वर्ष इजरायली सेनाको आक्रमणले धेरै भवनहरू भग्नावशेषमा परिणत गरेको थियो ।

खोप अभियानमा इजरायलद्वारा बहिष्कृत प्यालेस्टिनी शरणार्थीका लागि संयुक्त राष्ट्र राहत तथा कार्य एजेन्सी (यूएनआरडब्लूए)सहित विभिन्न संयुक्त राष्ट्र एजेन्सीहरू संलग्न छन् र यो अभियान इजरायल र हमासले युद्धविराम पालना गरिरहेको समयमा आएको छ ।

यस अभियानले फेब्रुअरी २६ सम्ममा पाँच लाख ९१ हजारभन्दा बढी बालबालिकालाई खोप लगाउने लक्ष्य राखेको विश्व स्वास्थ्य सङ्गठन (डब्लूएचओ)ले जनाएको छ ।

‘यस अभियानमा एक हजार सात सयभन्दा बढी यूएनआरडब्लूए टोलीका सदस्यले भाग लिनेछन्’, यूएनआरडब्लूए प्रमुख फिलिप लाजारिनीले एक्समा लेखेका छन्, ‘यो अभियान हालै फोहोर पानीमा पोलियो पत्ता लागेपछि शुरू गरिएको हो, जसले बालबालिकाको जीवनलाई जोखिममा पारेको छ ।’

बीस वर्षभन्दा बढीमा पहिलोपटक गाजामा अत्यधिक सङ्क्रामक रोग फेरि देखा परेपछि सन् २०२४ को अन्त्यमा अघिल्लो दुई अभियानहरू सञ्चालन गरिएको थियो ।

इजरायल र हमासबीच १६ महिनाभन्दा बढीको युद्ध पछि गाजामा मानवीय अवस्था भयावह छ ।

युद्ध शुरू हुनुअघि नै यो क्षेत्र १५ वर्षभन्दा बढी समयदेखि इजरायलले लगाएको नाकाबन्दीको कारण सङ्घर्षरत थियो ।