सामग्री खोज्नुहोस्

एजेन्सी । वासिङ्टन डीसी नजिकै अमेरिकी सेनाको हेलिकप्टर र यात्रुवाहक विमान आपसमा ठोक्किँदा कम्तीमा १८ जनाको मृत्यु भएको छ। दुर्घटना भएको स्थानमा उद्धार टोलीले शवहरू संकलन गरिरहेको छ।

दुर्घटनाको कारण अझै स्पष्ट नभए पनि प्रारम्भिक रिपोर्ट अनुसार दुई उडानबीचको समन्वयमा समस्या देखिएको अनुमान गरिएको छ।

बुधबार साँझ वासिङ्टन डीसीको रिगन नेशनल एयरपोर्ट नजिकै दुर्घटना भएको हो । ६४ यात्रु बोकेको अमेरिकी एयरलाइन्सको ‘फ्लाइट ५३४२’ कन्सासबाट वासिङ्टनतर्फ उडिरहेको थियो । सोही समयमा अमेरिकी सेनाको ब्ल्याक हक हेलिकप्टर पनि प्रशिक्षण उडानमा थियो । आकाशमै ठोक्किएर दुवै विमान नदीमा खस्दा ठूलो मानवीय र भौतिक क्षति भएको छ ।​

सीएनएनका अनुसार यतिबेला करिब ३ सय उद्धारकर्मीले पोटोम्याक नदीमा दुर्घटनाग्रस्त विमान र हेलिकप्टरका भग्नावशेष खोजिरहेका छन् ।

वासिङ्टन डीसीका अग्नि नियन्त्रक प्रमुखले नदीको चिसो तापक्रम र कठोर वातावरणका कारण उद्धार कार्य चुनौतीपूर्ण भएको बताएका छन् । हालसम्म कुनै पनि जीवित व्यक्ति फेला परेका छैनन्।

अमेरिकी अधिकारीहरूले घटनाको विस्तृत अनुसन्धान शुरू गरेको जनाएका छन्।  

घटनास्थलमा आपतकालीन उद्धार टोली परिचालित छन् भने बाँकी यात्रुहरूको अवस्था र क्षतिको विस्तृत विवरण आउन बाँकी छ।