सामग्री खोज्नुहोस्

एजेन्सी । पाकिस्तानका प्रधानमन्त्री शाहबाज शरिफले देशका दुई करोड २० लाखभन्दा बढी बालबालिका विद्यालय बाहिर रहेको बताएका छन् । 

मुस्लिम राष्ट्रहरूले विशेष रूपमा बालिकाहरूको शिक्षामा ध्यान दिनुपर्ने उनको भनाइ छ ।​

ईस्लामाबादमा आयोजित दुई दिने ‘मुस्लिम समुदायमा बालिका शिक्षा : चुनौती र अवसर’ विषयक अन्तर्राष्ट्रिय सम्मेलनमा बोल्दै प्रधानमन्त्री शरिफले मुस्लिम राष्ट्रहरूले बालिकाहरूको शिक्षामा समान पहुँच सुनिश्चित गर्नुपर्ने महत्त्वपूर्ण अवरोधहरू स्वीकार गर्नुपर्नेमा जोड दिए।  

उनले आगामी दशकमा लाखौं युवा बालिकाहरू श्रम शक्तिमा प्रवेश गर्ने अवसर रहेको भन्दै उनीहरूले आफ्नो परिवारलाई गरिबीबाट माथि उठाउन र विश्व अर्थतन्त्रमा योगदान पुर्‍याउन सक्षम हुने सम्भावना रहेको बताए ।  

पाकिस्तानको कुल जनसङ्ख्याको आधाभन्दा बढी महिला भए पनि महिला साक्षरता दर केवल ४९ प्रतिशत रहेको तथ्य प्रधानमन्त्री शरिफले प्रस्तुत गरे ।

पाँचदेखि १६ वर्ष उमेर समूहका करिब दुई करोड २८ लाख बालबालिका विद्यालय बाहिर रहेको र तीमध्ये बालिकाहरूको सङ्ख्या उल्लेखनीय रहेको उनले जानकारी दिए ।