सामग्री खोज्नुहोस्

एजेन्सी । क्यानडाका प्रधानमन्त्री जस्टिन ट्रुडोले आफ्नो लिबरल पार्टीभित्र बढ्दो असहमतिको कारण यसै साता राजीनामा दिने सम्भावना रहेको छ।

‘द ग्लोब एन्ड मेल’ पत्रिकाका अनुसार, पार्टीका आन्तरिक मामिलाबारे जानकार तीन स्रोतले ट्रुडोले सोमबारदेखि बुधबारभित्र घोषणा गर्न सक्ने बताएका छन्। 

राजीनामाको घोषणा राष्ट्रिय लिबरल पार्टीको बैठकअघि बुधबार सम्भव हुने अनुमान गरिएको छ। ट्रुडोले राजीनामा दिएपछि उनले अन्तरिम प्रधानमन्त्रीका रूपमा भूमिका निभाउने वा नगर्ने विषयमा निर्णय हुन बाँकी रहेको बताइएको छ।  

हालैका महिनाहरूमा ट्रुडोको लोकप्रियता घट्दै गएको छ। उनको सरकार अविश्वासको मतको शृङ्खलाबाट जोगिए पनि पार्टीभित्र र बाहिरबाट आलोचना भइरहेको छ। आगामी सन् २०२५ को चुनावमा लिबरल पार्टीलाई नेतृत्व दिने ट्रुडोको प्रतिबद्धता थियो।  

यसैबीच, ट्रम्प प्रशासनबाट क्यानडाका सामानहरूमा कर लगाउने चेतावनीको सामना गर्दै ट्रुडो थप दबाबमा रहेका छन् ।