सामग्री खोज्नुहोस्

काठमाडौं । यही जनवरी १८ देखि मलेसियामा हुने आईसीसी यू-१९ महिला टी २० विश्वकप क्रिकेटका लागि पूजा महतोको कप्तानीमा १५ सदस्यीय नेपाली टोली घोषणा भएको छ ।

टोलीमा सोनी पाख्रिन (उपकप्तान), सना प्रविन, ज्योत्सनिका मरासिनी, कुसुम गोदार, अलिसा कुमारी यादव, सावित्री धामी, कृष्मा गुरुङ, तृष्णा विक, किरण कुमारी कुँवर, रिया शर्मा, सिमाना केसी, रचना चौधरी, स्नेहा महरा र अनु कडायत रहेको नेपाल क्रिकेट संघ (क्यान)ले जनाएको छ । 

गत डिसेम्बरमा मलेसियामा भएको एसीसी यू-१९ महिला एसिया कप खेलेको टोलीलाई नै विश्वकपको टोलीमा निरन्तरता दिइएको छ । 

गत नोभेम्बरमा यूएईमा भएको आईसीसी यू-१९ महिला विश्वकप एसिया छनोटको उपाधि जित्दै नेपाल पहिलो पटक यू-१९ महिला विश्वकपकमा छनोट भएको थियो । 

जनवरी १८ देखि फेब्रुअरी २ सम्म मलेसियामा हुने यू-१९ महिला टी २० विश्वकपमा नेपालसहित १६ राष्ट्रको सहभागिता छ । 

नेपाल समूह ‘डी’ मा छ । यस समूहमा अष्ट्रेलिया, बंगलादेश र स्कटल्याण्ड छन्  । नेपालले पहिलो खेल जनवरी १८ मा बंगलादेशसँग खेल्नेछ । यस्तै, जनवरी २० मा स्कटल्याण्डसँग र जनवरी २२ मा अष्ट्रेलियासँग खेल्नेछ ।