सामग्री खोज्नुहोस्

एजेन्सी। नयाँ वर्षको पहिलो दिन अमेरिकाको दक्षिण शहर न्यु अर्लिन्समा भएको दुर्घटनामा परी कम्तिमा १५ जनाको मृत्यु भएको छ।

नयाँ बर्ष मनाउन पर्यटकीय क्षेत्र फ्रेन्च क्वार्टरको सडकमा भेला भएका मानिसहरुको भीडमा एक संदिग्धले अन्धाधुन्ध ट्रक प्रवेश गराउदा १५ जनाको मृत्यु भएको अलजजिराले जनाएको छ।

अमेरिकी अधिकारीहरुले यो दुर्घटना नभएर योजनाबद्द ढङ्गले आक्रमण गरिएको बताएका छन्। उक्त दुर्घटनामा परी दर्जन भन्दा बढी मानिसहरु घाइते भएको पनि समाचारमा उल्लेख गरिएको छ।

ट्रक चालक दक्षिण टेक्सासका ४२ वर्षीय शमसुद दिन जबरको प्रहरीसँगको गोली हानाहानका क्रममा घटनास्थलमै मृत्यु भएको फेडरल ब्यूरो अफ इन्भेस्टिगेशनले जनाएको छ। अमेरिकी अधिकारीहरुले उक्त घटनालाइ आतंकबादी हमलाका रुपमा लिंदै अनुसन्धान गरिरहेको बताएका छन्।

घटना पश्चात आयोजित एक पत्रकार सम्मेलनमा फेडरल ब्यूरो अफ इन्भेस्टिगेशनले यो घटना एक्लो व्यक्तिले गराएको भनेर बिश्वाश गर्न नसकिने प्रतिक्रिया दिए। ‘संदिग्धको ट्रकले इस्लामिक स्टेटको चरमपन्थी समूहसँग सम्बन्धित झण्डा देखाएको थियो’ पत्रकार सम्मेलनमा अधिकारीहरुले भने ‘ट्रकको वरपर विस्फोटक पदार्थ फेला परेको थियो, त्यसैले यो घटनालाई आतंकवादी हमलाको रुपमा अनुसन्धान गरिरहेका छौं।’

कुनैपनि आक्रमण शैय छैन : बाइडेन

उक्त घटनाका सन्दर्भमा अमेरिकी राष्ट्रपति जोय बाइडेनले आफ्नो भूमिमा हुने कुनैपनि आक्रमण शैय नहुने चेतावनी दिएका छन्। ‘मैले सुरक्षा निकाय बाट रिपोर्टहरु प्राप्त गरिरहेको छु’ बाइडेनले भनेका छन् ‘मेरो ध्यान पीडित र उनका परिवारजनप्रति छ।’

त्यस्तै नबनिर्वाचित राष्ट्रपति डोनाल्ट ट्रंपले पनि घटनाको कडा आलोचना गरेका छन्। घटना पश्चात सामाजिक संजालमा प्रतिक्रिया ब्यक्त गर्दै आफ्ना नागरिक माथिको आक्रमणलाइ स्वीकार गर्न नसकिने बताएका छन्।