सामग्री खोज्नुहोस्

एजेन्सी । थाइल्यान्डबाट दक्षिण कोरियाको मुआन अन्तर्राष्ट्रिय विमानस्थल जाँदै गरेको जेजु एयरको विमान आइतबार अवतरणका क्रममा दुर्घटनाग्रस्त हुँदा १७९ जनाको मृत्यु भएको छ।  

जेजु एयरको उडान 7C2216 बिहान ९ बजेपछि अवतरण गर्ने क्रममा रनवेबाट चिप्लिएर बारमा ठोक्कियो र आगलागी भयो।

विमानमा १८१ जना सवार थिए। दुर्घटनामा १७९ जनाको मृत्यु भएको र दुई जनालाई जीवितै उद्धार गरिएको दक्षिण कोरियाको यातायात मन्त्रालयले जानकारी दिएको छ।

यो दुर्घटना दक्षिण कोरियाको एयरलाइन्ससँग सम्बन्धित तीन दशकयताकै सबैभन्दा भयानक दुर्घटना भएको बताइएको छ।  

स्थानीय मिडियामा सार्वजनिक भिडियोमा दुई इन्जिन भएको बोइङ ७३७-८०० विमान अवतरणका क्रममा ल्यान्डिङ गियर नखुलेको देखिएको छ। विमान रनवेमा चिप्लिएर बारमा ठोक्किँदा आगोको लप्का र भग्नावशेष फैलिएको देखिन्छ।

अन्य तस्वीरहरूमा विमानको केही भागमा आगलागी र धुवाँ उठिरहेको देख्न सकिन्छ।  

दक्षिण कोरियाका अधिकारीहरूले दुर्घटनाको कारणबारे अनुसन्धान गरिरहेको बताएका जापान टाइम्सले जनाएको छ ।