सामग्री खोज्नुहोस्

टोकियो। बैदेशिक रोजगार विभागमा दर्ता भएको कुमार कार्कीको केबीएल इण्टरनेशनलले नक्कली सिओइ मार्फत जापानमा मान्छे पठाउने गरेको पाइएको छ ।

सन् २०२३ मार्च महिनामा नक्कली सिओइ मार्फत जापान प्रवेश गर्न खोज्ने १२ जना नेपालीलाइ नारिता विमानस्थलको अध्यागमन बिभागले फिर्ता पठाएको प्रमाण क्योदाई न्यूजले प्राप्त गरेको छ।

‘हामी जापान पुगेपछि अध्यागमनले सिओइ नक्कली भन्दै फिर्ता गरेको थियो’ हाम्रो सम्पर्कमा आएका ति पिडितहरुले भने ‘नेपाल फर्केपछि कार्की बिरुद्द बैदेशिक रोजगार विभागमा उजुरी समेत दिएका छौं।’

२०२३ मार्च महिनाको १९ तारिख बिमान बंगला मार्फत जापान आएका १६ जना मध्ये १२ जना नेपालीलाइ अध्यागमनले मार्च २२ तारिख फिर्ता पठाएको थियो ।

कार्कीले जापानबाट फर्केकाहरुलाई पुनः जापान पठाउने भन्दै नयाँ पासपोर्ट समेत बनाउन भनेको पिडितहरुले बताएका छन्।

उनीहरुलाई अध्यागमनले स्वदेश फिर्ता पठाएपछि कार्की बिरुद्द रोजगार बिभागमा उजुरी समेत परेको पाइएको छ।

उजुरी पश्चात बैदेशिक रोजगार बिभागले उपत्यका अपराध अनुसन्धान कार्यालयलाइ २०८१ साउन महिनाको ११ गते निजलाई पक्राउ गरी बिभागमा बुझाउन पत्र समेत काटेको थियो।

पक्राउ पुर्जी काटेको थाह पाएपछि हाल कार्की फरार रहेका छन्। क्योदाई न्यूज संगको सम्पर्कमा आएका पिडितहरुका अनुसार कार्कीले त्यतिबेला प्रतिव्यक्ति ११ देखि २२ लाख सम्म लिएका थिए ।