सामग्री खोज्नुहोस्

एजेन्सी । अमेरिकाको विस्कन्सिनस्थित ‘अबन्डन्ट लाइफ क्रिश्चियन स्कूल’मा एक छात्राले गोली चलाउँदा २ जनाको मृत्यु भएको छ।

म्याडिसनस्थित निजी क्रिश्चियन विद्यालयमा एक १५ वर्षीया छात्राले गोली चलाउँदा अन्य छ जना विद्यार्थी घाइते भएका छन् । तीमध्ये दुईको अवस्था गम्भीर छ।​

म्याडिसन प्रहरी प्रमुख शोन बार्न्सका अनुसार विद्यालयमा गोली चलाएकी आक्रमणकारी छात्रा पनि घटनास्थलमै मृत फेला परेकी छिन् ।

प्रारम्भिक अनुसन्धानले उनले आत्महत्या गरेको हुनसक्ने देखाएको बीबीसीले जनाएको छ ।

सबैभन्दा पहिले दोस्रो कक्षामा अध्ययनरत एक विद्यार्थीले आपतकालीन सेवामा फोन गरी सक्रिय आक्रमणको सूचना दिएका थिए, जसका कारण प्रहरी छिट्टै घटनास्थलमा पुग्न सफल भयो।

राष्ट्रपति जो बाइडेन र विस्कन्सिनका गभर्नर टोनी एभरर्सले यस घटनाप्रति दुःख व्यक्त गर्दै बन्दुक नियन्त्रणसम्बन्धी कडा कानूनी उपायहरूको आवश्यकता औंल्याएका छन् ।