सामग्री खोज्नुहोस्

एजेन्सी । इन्डोनेसियाको पूर्वी जाभा प्रान्तमा आइतबार एउटा पानी जहाज दुर्घटना हुँदा एक जनाको मृत्यु भएको छ । अन्य ४९ जनाको उद्धार गरिएको उद्धारकर्ताहरूले जानकारी दिएका छन् ।

उक्त पानी जहाज सुमेनेप रिजेन्सीको बन्दरगाहबाट प्रस्थान गरेपछि दिउँसो १ः१० बजे दुर्घटना भएको हो ।

जहाज सितुबोन्डो रेजेन्सीको बन्दरगाहतर्फ गइरहेको थियो । प्रान्तीय खोज तथा उद्धार कार्यालयका प्रमुख मुहम्मद हरियादीका अनुसार दुवै राज्यहरू पूर्वी जाभा प्रान्तमा अवस्थित छन् ।​

मुहम्मद हरियादीले भने, ‘एक जनाको मृत्यु भएको, अर्को बेपत्ता र अन्य ४९ जनाको उद्धार गरिएका छन् ।’

उद्धारमा संयुक्त उद्धार टोलीका करिब ५० जना कर्मचारी संलग्न रहेका र बेपत्ता व्यक्तिको खोजी कार्य जारी रहेको उनले बताए ।

हरियादीले उक्त घटनाका लागि चरम मौसमी अवस्थालाई दोष लगाएका छन् ।