सामग्री खोज्नुहोस्

टोकियो। पछिल्लो समय नेपाली चलचित्रहरु जापानमा प्रदर्शन हुने क्रम बढ्दो छ। अहिले जापानका विभिन्न ठाउहरुमा पूर्णबहादुरको सारंगी, १२ गाउँ, बेहुली फरम मेघौली लगायतका चलचित्र प्रदर्शनरत छन्।

यसैक्रममा अर्को नेपाली चलचित्र ह्रस्व दीर्घ पनि जापानका विभिन्न ठाउमा प्रदर्शन हुने पक्का भएको छ। ह्रस्व दीर्घको जापान राइट्स खरिद गरेको बिटिकेएस इण्टरटेण्टमेन्टले दिएको जानकारी अनुसार जापानका चिबा, टोकियो, साइतामा, कान्साई, ओकिनवा, फ़ुकुओका, होक्काइदो, खानागावा, निगाता, सेन्दाई, तोचिगी लगायतका क्षेत्रमा प्रदर्शन हुने पक्का भएको छ।

चिबाको चिबा शहरमा डिसेम्बर ८ तारिख कलाकार सहित रेड कार्पेट शो गर्न लागिएको बिटिकेएस इण्टरटेण्टमेन्टका बिमल न्यौपानेले जानकारी दिए। उनका अनुसार अभिनेत्री तथा निर्माता निता ढुंगाना अधिकारी र हरिहर अधिकारी चलचित्र प्रदर्शनका क्रममा जापान आउन लागेका हुन्।

कान्साई क्षेत्रको कोबेमा नोभेम्बर २६, क्योतोमा डिसेम्बर १७ र ओकिनावा प्रेफेक्चरमा डिसेम्बर १ मा चलचित्र प्रदशन गर्ने तय भएको छ। बाँकी क्षेत्रमा प्रदर्शनको मिति तय भैनसकेको न्यौपानेले जानकारी दिए।