सामग्री खोज्नुहोस्

काठमाडौं । वैदेशिक रोजगारीको सिलसिलामा पोर्चुगल पुगेका कैलालीका एक नेपाली युवा बेपत्ता भएका छन् ।

पोल्याण्ड हुँदै दुई वर्ष अघि पोर्चुगल पुगेका धनगढी उपमहानगरपालिका–१२ का २८ वर्षीय सुरेशकुमार ओझा विगत चार महिनादेखि बेपत्ता भएका हुन् ।

ओझा गत जुलाई ५ तारिखदेखि सम्पर्कविहीन भएका सुदूरपश्चिमेली नेपाली समाज पोर्चुगलका अध्यक्ष  दीपेश विष्टले जानकारी दिए । 

राजधानी लिस्बनस्थित एक रेष्टुराँमा काम गर्दै आएका उनी सात महिनाअघि एकाएक बेवारिसे भएका थिए ।

बेवारिसे भएका ओझालाई मेट्रो स्टेसनबाट नाजुक अवस्थामा उद्धार गरी लिस्बनस्थित एक होस्टेलमा खाने बस्ने व्यवस्था मिलाएर राखिएको भए पनि होस्टेलबाटै भागेर बेपत्ता भएको विष्टले बताए ।

‘हामीले धेरै पटक उनको उद्धार गर्यौं । परिवारको आग्रहमा नेपाल पठाउने तयारी पनि गरेका थियौं । तर, उनी एकाएक सम्पर्कविहीन भएका हुन्,’ विष्टले भने ।

समाजको पहल र व्यवस्थापनमा होस्टेलमा बस्दै आएका उनी गत जुलाईदेखि सम्पर्कविहीन भएका हुन् । हाल उनको खोजीकार्य भइरहेको र पोर्चुगलमा क्रियाशील नेपाली सङ्घ–संस्थालाई समेत उनको खोजबिनमा सहयोग गर्न आग्रह गरिएको विष्टले बताए ।

बेपत्ता ओझा हालसम्म परिवार, आफन्तलगायत कोही कसैको सम्पर्कमा नआएको भन्दै उनको खोजी गरी नेपाल पठाइदिन परिवारले आग्रह गरेको उनले बताए ।