सामग्री खोज्नुहोस्

एजेन्सी । गत हप्ता फिलिपिन्समा आएको ट्रामी नाम दिइएको आँधीले निम्त्याएको बाढी तथा पहिरोमा परी मृत्यु हुनेको सङ्ख्या ११६ जना पुगेको छ ।

आँधीका कारण ३९ जना अझै बेपत्ता रहेको फिलिपिन्सको राष्ट्रिय विपद् जोखिम न्यूनीकरण र व्यवस्थापन परिषद्ले सोमबार जनाएको छ ।

स्थानीय अधिकारीहरूका अनुसार ट्रामीले फिलिपिन्सका १७ वटा क्षेत्रमा ६७ लाखभन्दा बढी मानिसहरूलाई प्रभावित बनाएको छ भने अझै बाढी पहिरोका प्रभावितहरूको खोजी कार्य जारी रहेको छ । 

यस वर्ष फिलिपिन्समा आएका चक्रवातमध्ये ट्रामी ११ औं चक्रवात हो र यसले विशेष गरी बिकोल, क्यालाबारजोन र मध्य तथा दक्षिणी फिलिपिन्सका क्षेत्रहरूमा तुलनात्मक रूपमा बढी क्षति गरेको भए पनि फिलिपिन्सभरि प्रभाव पारेको थियो ।

आँधीसँगै आएको बाढीले राजमार्ग, पुललगायतका संरचना ध्वस्त पारी यातायात अवरुद्ध भएको छ ।  

शुक्रबार ट्रामी फिलिपिन्सबाट बाहिरिए पनि पीडितहरू अझै खाना, पानीलगायतका आधारभूत आवश्यकता आपूर्तिको पर्खाइमा रहेका छन् ।

शनिबारदेखि बाढीपहिरोको प्रभाव कम भएपछि केही पीडितहरू आफ्नो घर फर्कन थालेका छन् । 

यद्यपि, परिषद्ले करिब दश लाख विस्थापितहरू अझै पनि निकासी केन्द्रमा वा आफन्तहरूसँग बसिरहेको जनाएको छ ।