सामग्री खोज्नुहोस्

काठमाडौं । आईसीसी विश्वकप लिग-२ मा नेपाल अमेरिकासँग ३ विकेटले पराजित भएको छ ।

नेपालले दिएको २८७ रनको लक्ष्य अमेरिकाले ४९.४ ओभरमा ७ विकेट गुमाएर पूरा गर्‍यो ।

अमेरिकाको जीतमा ओपनर शयान जहाजिंगरले ९७ बलमा सर्वाधिक १०४ रन बनाए ।

कप्तान मोनांक पटेलले ७६ बलमा ६२ रन बनाए । दोस्रो विकेटका लागि मोनांक र शयानले १६१ रनको साझेदारी गरेका थिए ।​

हरमित सिंहले ४४ बलमा ५७ रन जोडे । विजयी छक्का हानेका शाड्ली २७ र जसदीप सिंह ११ रनमा नटआउट रहे ।

त्यसअघि ग्राण्ड प्रेरी क्रिकेट रंगशाला डालसमा टस हारेर पहिला ब्याटिङको निम्तो पाएको नेपालले ५० ओभरमा अल आउट हुँदै २८६ रन बनाएको थियो । नेपालका कप्तान रोहित पौडेलले ७५ बलमा सर्वाधिक ९६ रनको इनिङ खेलेका थिए ।

ओपनर आसिफ शेखले ५३ बलमा ५२ तथा अनिल साहले ६२ बलमा ५६ रन बनाएका थिए । 

नेपालले अब मंगलबार स्कटल्यान्डसँग खेल्नेछ ।

नेपाल लिग २ मा ९ खेलमा ७ मा हार, १ मा जीत र १ खेलमा अंकविहीन हुँदै ३ अंकका साथ सातौं स्थानमा छ ।

अमेरिका १० खेलमा ७ मा जितसहित १४ अंकका साथ दोस्रो स्थानमा छ ।