सामग्री खोज्नुहोस्

एजेन्सी । हमासलाई पुनर्गठन हुनबाट रोक्ने उद्देश्यले इजरायलले शुरू गरेको आक्रमणबाट गाजा क्षेत्रको उत्तरी भागमा ७ सय ७० भन्दा बढी मानिसको मृत्यु भएको छ ।

हमासको सन् २०२३ अक्टोबर ७ को आक्रमणपछि गाजामा करिब एक वर्षको युद्धपछि इजरायलले गत महिना लेबनानतर्फ आफ्नो ध्यान केन्द्रित गर्‍यो र हिजबुल्लाहको आक्रमणबाट आफ्नो उत्तरी सीमा सुरक्षित गर्ने प्रतिबद्धता जनायो ।​

यसैबीच गाजाको उत्तरी भागमा दशौं हजार नागरिक फसेका गाजाको नागरिक सुरक्षा निकायले बिहीबार जानकारी दिएको छ । 

त्यहाँ इजरायलले यस महिनाको शुरूमा सैन्य कारबाही शुरू गरेर हमासमाथि दबाब कायम राखेको छ ।

‘उत्तरी गाजामा सैन्य कारबाही शुरू भएयता सात सय ७० भन्दा बढी मानिसको मृत्यु भएको छ’, क्षेत्रको नागरिक सुरक्षा निकायका प्रवक्ता महमुद बस्सलले भने । उनले भग्नावशेषमुनि मानिसहरू पुरिएका हुनाले मृत्यु सङ्ख्या बढ्नसक्ने बताए ।

उनका अनुसार मध्य गाजामा विद्यालय–आश्रयस्थलमा भएको आक्रमणमा १७ जनाको मृत्यु भएको छ ।

इजरायली सेनाले भने उक्त स्थलमा हमास लडाकूहरूलाई लक्षित गरेर आक्रमण गरेको बताएको छ ।