सामग्री खोज्नुहोस्

एजेन्सी । इजरायली सेनाले गाजा क्षेत्रमा रहेको शरणार्थी शिविरमा आक्रमणमा गर्दा कम्तीमा १७ जनाको मृत्यु भएको छ ।

गाजाको नागरिक सुरक्षा विभागले जनाएअनुसार शिविरमा इजरायली सैन्य विमानबाट क्षेप्यास्त्र प्रहार भएको थियो ।

‘नागरिक सुरक्षा टोलीले मध्यगाजाको अल–बुरेज शरणार्थी शिविरमा इजरायली सैन्य विमानबाट क्षेप्यास्त्र प्रहार हुँदा मृत्यु भएका अब्दुल हादी परिवारको तीन तले घरबाट बालबालिकासहित १७ जनाको शव निकालेको छ भने अन्य घाइतेहरूको उद्धार गरेको छ’, विभागका प्रवक्ता महमुद बासलले विज्ञप्तिमार्फत भनेका छन् ।​ 

बसालले मृतकको शव र अन्य घाइतेलाई नुसिरात शिविरको अल–अवदा अस्पताल र देइर अल–बलाह शहरको अल–अक्सा शहीद अस्पतालमा लगिएको बताए ।​

गाजाको मध्य र उत्तरी भागमा मङ्गलबार बिहानदेखि थुप्रै हवाई आक्रमणहरू भएको बासलको भनाइ छ ।​ 

प्रत्यक्षदर्शी एवं उद्धारकर्ताले जबलियामा इजरायली सैन्य कारबाही जारी रहेको बताएका छन् ।  

पछिल्लो दिनमा  इजरायली सेनाले जबलियामा गरेको हवाई आक्रमणमा लगभग २० जनाको मृत्यु भएको सेनाले एक विज्ञप्तिमा जनाएको थियो ।