सामग्री खोज्नुहोस्

काठमाडौं । गैरआवासीय नेपाली सङ्घ (एनआरएनए)ले बाढी, डुबान तथा पहिरोबाट प्रभावित १ सय २० परिवारलाई राहत वितरण गरेको छ ।

काठमाडौंको दक्षिणकाली नगरपालिका र मकवानपुरको इन्द्रसरोवर गाउँपालिकास्थित सिस्नेरीका विपद् प्रभावितलाई राहत वितरण गरिएको हो ।

बाढी, डुबान तथा पहिरोका कारण प्रभावित दक्षिणकालीका ५० परिवार तथा इन्द्रसरोवर गाउँपालिकाको सिस्नेरीका ७० परिवारलाई खाद्य सामग्री, लत्ताकपडा, कम्बल, म्याट्रेस, त्रिपाल, सोलार बत्तीलगायत सामग्री वितरण गरिएको हो ।

स्थानीय तहसँग समन्वयपश्चात् दुवै जिल्लाका अति प्रभावितलाई  राहत वितरण गरिएको सङ्घले जनाएको छ ।

यसअघि सङ्घले अविरल वर्षापछि आएको बाढी, डुबान तथा पहिरो प्रभावितका लागि रु एक करोड सहयोग गर्ने घोषणा गरेको थियो । पहिलो चरणमा आज दक्षिणकाली नगरपालिका र मकवानपुरको इन्द्रसरोवर गाउँपालिकाको सिस्नेरीमा राहत वितरण गरिएको हो ।

सोमबार काभ्रेपलाञ्चोकको पनौती नगरपालिका र बुधबार ललितपुरको ठोस्नेखोलामा पीडित परिवारलाई राहत वितरण गर्ने सङ्घले जनाएको छ ।

सङ्घले तराईका विभिन्न जिल्लामा पनि राहत वितरणका लागि स्थानीय तहसँग समन्वय गरिरहेको जनाएको छ । 

यस्तै, प्रधानमन्त्री दैवी प्रकोप उद्धार कोषमा सङ्घले आर्थिक सहयोग गर्ने निर्णय गरेको छ ।