सामग्री खोज्नुहोस्

टोकियो । जापानका प्रधानमन्त्री फुमियो किशिदा र उनका क्याबिनेट सदस्यहरूले राजीनामा दिएका छन् । जसले शिगेरु इसिबालाई नयाँ प्रधानमन्त्रीको रूपमा पदभार ग्रहण गर्न मार्ग प्रशस्त गरेको छ। 

मंगलबार क्याबिनेट बैठकमा प्रधानमन्त्री किशिदा र उनका मन्त्रीहरूले राजीनामाको घोषणा गरेका हुन्। 

शुक्रबार सत्तरुढ दल लिबरल डेमोक्रेटिक पार्टी (एलडीपी)को नेतृत्व चयनमा इसिबा विजयी भएका थिए । 

किशिदाले तीन वर्षको कार्यकालको अन्त्यमा अगस्टमा राजीनामा दिने घोषणा गरेका थिए।

मंगलबार संसद्‌मा एलडीपीको बहुमत भएकाले इसिबा नयाँ प्रधानमन्त्रीमा निर्वाचित हुने पक्का छ। इसिबाले आफ्नो नयाँ क्याबिनेट पनि सोही दिन घोषणा गर्नेछन्।

किशिदाले सन् २०२१ मा प्रधानमन्त्रीको पद सम्हालेका थिए, तर उनका सरकारले सामना गरेका विभिन्न घोटालाका कारण उनको पार्टीले नयाँ नेतृत्वको आवश्यकता देखेर उनलाई बिदा गरेको हो। 

सोमबार, इसिबाले औपचारिक रूपमा प्रधानमन्त्री बनेपछि अक्टोबर २७ मा संसदीय चुनाव गर्ने योजना रहेको बताएका थिए।