सामग्री खोज्नुहोस्

एजेन्सी । स्पेनको क्यानरी टापुमा आप्रवासी बोकेको डुङ्गा दुर्घटना हुँदा कम्तीमा ९ जनाको मृत्यु भएको छ । अन्य ४८ जना बेपत्ता भएका राष्ट्रिय सामुद्रिक उद्धार सेवाले शनिबार जनाएको छ ।​

एटलान्टिक द्वीपसमूहको एक टापु ‘एल हिएरो’बाट मध्यरातपछि आएको आपतकालीन फोनको जवाफ उद्धारकर्ताले दिएपछि ८४ जना सवार डुङ्गाबाट २७ जनालाई उद्धार गरिएको एक विज्ञप्तिमा जनाइएको छ ।​

आप्रवासीहरू मुख्य भूमि युरोप पुग्ने आशामा क्यानरी पार गर्ने क्रममा उक्त क्षेत्रमा सेप्टेम्बरको सुरुमा ३९ जना आप्रवासीको मृत्यु भएको थियो ।​

हालैका वर्षहरूमा हजारौं आप्रवासीहरूले युरोप पुग्नका लागि खचाखच भरिएका र प्रायः जीर्ण डुङ्गाहरूमा एटलान्टिक महासागरमा यात्रा गर्ने गरेका छन् । ​​

‘पछिल्लो त्रासदीले एटलान्टिक मार्गको खतरनाक यात्रालाई फेरि उजागर गरेको छ’, क्यानरीका क्षेत्रीय अध्यक्ष फर्नान्डो क्लाभिजोले एक्समा लेखेका छन्, ‘युरोपको दक्षिणी सीमाबाट केही मिटरको दूरीमा मानिसको ज्यान जाने भएकाले संरचनागत मानवीय त्रासदीको सामना गर्न स्पेन र इयूले निर्णायक कदम चाल्नुपर्छ ।’