सामग्री खोज्नुहोस्

चिबा, जापान। गैर आवासीय नेपाली संघ (एनआरएनए) क्षेत्रीय समिति चिवा र माचुदो सिटीको संयुक्त आयोजनामा माचुदो नेपाल फेस्टिवल चिबा २०२४ भव्यताका साथ सम्पन्न भएको छ।

गत आइतवार माचुदो शहरको माचुदो सेन्टर पार्कमा आयोजना गरिएको उक्त फेस्टिवल भब्य रुपमा सम्पन्न भएको आयोजकले जनाएको छ। आयोजकले दिएको जानकारी अनुसार जापानी र नेपाली गरी करिब १० हजार दर्शकको उपस्थिति रहेको थियो।

चिबाको माचुदो सिटीमा आयोजित नेपाल फेस्टिवलको तस्बिर। फोटो सौजन्य : मूल आयोजक समिति

कार्यक्रमको उद्घाटन नेपाल सरकारका श्रम मंत्री शरत शिंह भण्डारी, जापानका लागि नेपाली राजदुत डा. दुर्गाबहादुर सुबेदी, एनआरएनए अन्तराष्ट्रिय समन्वय परिषदका (आइसीसी) उपाध्यक्ष रोबिन शेरचन, एनआरएनए जापानका अध्यक्ष नबिन निउरे, माचुदो सिटिका मेयर होनगोया केन्जी लगायतले संयुक्त रुपमा गरेका थिए।

सो अबशरमा नेपालमा प्रचलित लाखे नाच, पन्चे बाजा, भजन, हनुमान नाच, साकेला नाच र जापानी जापानी सस्कृतिहरुको समेत प्रदर्शनी गरिएको मूल आयोजक समितिका संयोजक राजनबाबु सुबेदीले जानकारी दिए।

‘नेपाली कलाकारहरु संगै जापानी कलाकारहरुले समेत आफ्नो प्रस्तुति प्रस्तुत गरेका थिए’ सुबेदीले भने ‘समग्रमा फेस्टिबल सोचे भन्दा राम्रो संग सफल भएको छ।’

चिबाको माचुदो सिटीमा आयोजित नेपाल फेस्टिवलको उद्घाटन गर्दै अतिथिहरु। फोटो सौजन्य : मूल आयोजक समिति

मेलाला सभ्य बनाउनका लागि झन्डै ७० जना स्वंसेवकहरु परिचालन गरिएको पनि आयोजकले जनाएको छ।

मेलामा स्टल राखेका रेस्टुरेन्ट ब्यापारीहरुले पनि आफुहरुले सोचे भन्दा राम्रो ब्यापार भएको प्रतिक्रिया दिएका छन्। मेलामा स्टल राखेका भिन्तुना रेस्टुरेन्टका संचालक अनिल श्रेष्ठले दिउसो ४ बजे सबै परिकारहरु सकिएको बताए।

‘ब्यबसायिक हिसाबले पनि सोचे भन्दा राम्रो ब्यापार भयो’ श्रेष्ठले भने ‘यस्तो उपस्थिति हुन्छ भन्ने अनुमान मात्र गर्न सकेको भए धेरै परिकार तयार गर्ने थियौं।’ उनका अनुसार रेस्टुरेन्ट ब्यबसायीहरुले थोरैमा पनि १२ लाख सम्मको ब्यापार गरेका छन्।

चिबाको माचुदो सिटीमा आयोजित नेपाल फेस्टिवलमा उपस्थित दर्शकहरु । फोटो सौजन्य : मूल आयोजक समिति

अन्यत्र आयोजित फेस्टिवलहरुमा फोहोर ब्यबस्थापनमा टिकाटिप्पणि आउने गरेकाले माचुदो फेस्टिवलमा भने फोहोर ब्यबस्थापनमा बिशेष ध्यान दिएको स्टल ब्यबस्थापन समितिका संयोजक प्रकाश थापा मगरले जानकारी दिए।

‘अन्यत्रको अनुभव बाट सिकेर हामीले फोहर ब्यबस्थापनलाइ चुनौतीका रुपमा लिएका थियौं त्यसैले हाम्रो फोकस पनि यसमा थियो’ स्वंसेवकहरु परिचालन समितिका संयोजक टिकाराम न्यौपानेले भने ‘फोहोर ब्यबस्थापनमा समस्या उत्पन्न नहोस भनेर हाम्रा साथीहरु हरेक पटक राउण्डिङ्गमा निस्किएका हुन्थे।’

सम्पूर्ण तयारी सकिएपछि अघिल्लो दिन सांझ स्टेज अघि खिचिएको तस्बिर। फोटो सौजन्य : मूल आयोजक समिति

आयोजकका अनुसार हाल सम्म फेस्टिबल गर्न ६० लाख हाराहारीमा खर्च भएको छ। ‘एकिन हिसाब त गरिसकिएको छैन तर अन्तिम सम्ममा १० लाख सम्म नाफा हुन्छ कि भन्ने हाम्रो अनुमान छ’ मूल आयोजक समितिका संयोजक सुबेदीले भने।