सामग्री खोज्नुहोस्

एजेन्सी । चीनको एउटा माध्यमिक विद्यालय बाहिर मङ्गलबार एउटा स्कुल बस मानिसहरूको भिडसँग ठोक्किदा ११ जना अभिभावक र विद्यार्थीहरूको मृत्यु भएको छ ।

राज्य प्रसारणकर्ता सिसिटिभीले बिहान ७ः२७ बजे (स्थानीय समय) शानडोङ प्रान्तको ताइवान शहरको विद्यालय पुग्दा ड्राइभरले गाडीको ‘नियन्त्रण गुमाएको’ बताएको छ ।

सिसिटिभीका अनुसार बस सडक छेउमा अभिभावक र विद्यार्थीहरूको भिडसँग ठोक्किएको थियो । 

‘हालसम्म ११ जनाको मृत्यु भएको छ, जसमध्ये छ जना अभिभावक र पाँच जना विद्यार्थी थिए’, प्रसारणकर्ताले जनाएको छ । साथै घाइते हुने मध्य एक व्यक्तिको अवस्था गम्भीर रहेको र अन्य १२ जनाको अवस्था सामान्य रहेको बताएको छ । 

सामाजिक सञ्जालमा प्रसारण भएको फोटो र भिडियोमा रगतले लतपतिएका मानिसहरू खैरो बस नजिकै सडकमा लडेको देखाइएको छ ।

ड्राइभरलाई स्थानीय प्रहरीले पक्राउ गरेको र घटनाको अनुसन्धान भइरहेको सिसिटिभीले जनाएको छ ।