सामग्री खोज्नुहोस्

एजेन्सी । भारतीय प्रधानमन्त्री नरेन्द्र मोदी बुधबार पोल्याण्ड पुगेका छन् ।

रुस–युक्रेन युद्धको ‘शान्तिपूर्ण समाधान’का लागि अभियान शुरू गर्न यसै साताको अन्त्यमा युक्रेनको भ्रमण गर्नुअघि उनी पोल्याण्ड पुगेका हुन् ।

युक्रेनको भ्रमण गर्ने मोदी पहिलो भारतीय प्रधानमन्त्री हुनेछन् । साथै उनी ४५ वर्षमा पोल्याण्डको भ्रमण गर्ने पनि पहिलो भारतीय प्रधानमन्त्री हुनेछन् । 

पोल्याण्ड युक्रेनको कट्टर सहयोगी तथा छिमेकी देश हो र किएभ जाने विदेशी नेताहरूका लागि पोल्याण्ड महत्त्वपूर्ण ‘ट्रान्जिट’ पनि हो । 

मोदीले बिहीबार पोलिश प्रधानमन्त्री डोनाल्ड टस्क र राष्ट्रपति आन्द्रेज डुडाका साथै यस मुलुकमा रहेका भारतीय नागरिकहरूसँग भेट्ने अपेक्षा गरिएको छ । 

उनको भ्रमणअघि पोल्याण्डका उपप्रधानमन्त्री व्लादिस्लाव कोसिनियाक–कामिजले पत्रकारहरूसँग भने, ‘पोल्याण्डलाई भारतसँग दिगो साझेदारीको आवश्यकता छ ।’

मोदीले रुससँग भारतको ऐतिहासिक रूपमा न्यानो सम्बन्ध कायम राख्नुका साथै क्षेत्रीय प्रतिद्वन्द्वी चीनविरुद्ध पश्चिमी मुलुकहरूसँग घनिष्ठ सुरक्षा साझेदारी गरेर नाजुक सन्तुलन बनाएका छन् ।