सामग्री खोज्नुहोस्

१५ साउन, टोकियो । जापानमा हुने सेमिनारमा सहभागी गराउने भन्दै अबैध रुपमा जापानमा नेपाली भित्र्याउने समिर लामालाई प्रहरीले पक्राउ गरेर अनुसन्धान सुरु गरेको छ । मानव बेचबिखन अनुसन्धान ब्युरोले लामालाई पक्राउ गरेर अनुसनधान सुरु गरेको हो ।

ब्युरोका एक प्रहरी अधिकृतले भने, ‘अहिले पीडितहरु हाम्रो सम्पर्कमा आउनु भएको छ । पीडितले जाहेरी दर्ता गराएपछि हामी अपराधको प्रकृति अनुसारको मुद्दा चलाउने छौँ ।’ प्रारम्भिक अनुसन्धान अनुसार उनलाई मानब बेचबिखन, कागजात किर्ते, मानव तस्करी लगायतका अभियोगमा अनुसन्धान गरिने प्रहरीको भनाई छ ।
लामालाई सोमबार प्रहरीले त्रिभुवन अन्तर्राष्ट्रिय विमानस्थलबाट पक्राउ गरेको थियो । दुई युवतिसहित गत जुलाई १८ तारिख जापान आएका लामाले फर्जी कागजात बनाएर २३ जनाको भिसा आबेदन दिएको र लाखौँ रुपैयाँ असुल गरेको सूचना बाहिरीएको थियो ।

भिसा आबेदन दिएकाहरु ट्राभल एजेन्सिका मान्छे हुन्- समिर लामा
एनआरएनको कागजात दुरुपयोग गरेरे समिर लामा जापान भित्र्एिको विषय बाहिरीएसँगै लामाको खोजीकार्यमा एनआरएनए जापान सक्रिय थियो । एनआरएनए जापानले गत बिहिबार लामालाई जापानको ओसाकाबाट टोकियो ल्याई पत्रकार सम्मेलनसमेत गरेको थियो ।
पत्रकार सम्मेलनमा लामाले एनआरएनए जापान र ओसाकास्थित एक कम्पनीको कागजात दुरुपयोग गरी जापानमा नेपाली भित्र्याएको स्विकारेका थिए । उक्त कार्यमा ‘जापानबाट तपाईलाई कसको सहयोग छ ?’ भन्ने पत्रकारको प्रश्नमा लामाले सबै काम आफू एक्लैले गरेको बताएका थिए ।

पत्रकार सम्मेलनमा लामाले नेपालीलाई जापान भित्रउनका लागि आवश्यक कागजात बनाउन काठमाडौँको धुम्बाराहीमा रहेको ड्रिम ट्राभल र ठमेलमा रहेको अर्किड ट्राभलले सहयोग गरेको बताएका थिए । लामाले ट्राभल एजेन्सी सञ्चालनको नाम भने खुलाएका थिएनन् । ‘भिसा आबेद दिएकाहरु मेरा मान्छे होइनन्, ट्राभलले मान्छे कलेक्सन गर्छ’ समिर लामाले भने, ‘उनीहरुको टिकट खर्च, होटल खर्च म गर्छु । त्यो वापत ट्राभलबाट प्रतिव्यक्ति ५ लाख रुपैयाँ पाउँछु । जापानमा मेरो धेरै जनासँग चिनजान छ भनेर ट्राभल एजेन्सिले म मार्फत् पठाउनु भएको हो ।’

लामाले जापान भित्र्एका र भित्र्न लागेका २३ जना जापानमा अबैध रुपमा काम गर्न नभएर ‘भिजिट प्रोफाइल बनाउन’ लागि मात्र आउन लागेको जिकिर गरेका थिए । लामाले उनीहरुबाट प्रतिव्यक्ति १७ लाख रुपैयाँसम्म लिएको पीडितले जनाएका छन् । यति ठूलो रकम बुझाएर भिजिट प्रोफाइलका लागि मात्र कोही पनि जापान नआउने लामो समय जापान बस्दै आएका जानकारहरु बताउँछन् । यसरी अबैधरुपमा जापान आउनेहरु शरणार्थीको आबेदन दिने र केही समय जापान बस्ने उद्देश्यले आउने गरेका छन् ।

राजदुतावासले सहयोग नगरेको एनआरएनएकर्मीको गुनासो

संस्थाको नाम र संस्थामा आबद्ध पदाधिकारीको नामको दुरुपयोग गरी फर्जी कागजात बनाएको भन्दै एनआरएनए जापानले यसअघि नै सिआईबिमा उजुरीसमेत दिइसकेको एनआरएनए जापानका प्रवक्ता खगराज गौतमले बताए । जापानमा अपराधिक गतिबिधिमा नेपालीको संलग्नता रहेको विषय बाहिरीए पनि जापान स्थित नेपाली राजदुतावासले भने कुनै पनि सहयोग नगरेको एनआरएनए अभियानकर्मीले गुनासो गरे । एक एनआरएनए अभियानकर्मी भन्छन्, ‘हामीले लामालाई नेपाल फर्काउनका लागि पहल र सहकार्य गरिदिन राजदुत स्वयम्लाई अनुरोध गर्दा पनि कुनै सहयोग पाएनौँ ।’