सामग्री खोज्नुहोस्

काठमाडौं । काठमाडौंबाट पोखराका लागि उडेको शौर्य एयरलाइन्सको ९ एन–एएमई विमान त्रिभुवन अन्तर्राष्ट्रिय विमानस्थलमा दुर्घटना हुँदा १८ जनाको मृत्यु भएको छ ।

बुधबार बिहान भएकाे दुर्घटनामा विमानका को–पाइलट सुशान्त कटुवाल, विमानमा सवार अमितमान महर्जन, सागर आचार्य, दीलिप वर्मा, मनुराज शर्मा, अश्विन निरौला, सुदीपलाल जोशी, सर्वेश मरासिनी, श्याम विन्दुकार, नवराज आले, राजाराम आचार्य, प्रिजा खतिवडा, अधिराज शर्मा, उद्धव पुरी, यज्ञप्रसाद पौडेल, सन्तोष महतो, पुण्यरत्न शाही र यमनी नागरिक आरिफ रेडाको मृत्यु भएको छ ।

पोखराका लागि उडान भरेको केही समयमा नै दाहिने तिर मोडिएपछि धावनमार्गको पूर्वपट्टि रहेको स्थानमा विमान दुर्घटनामा परेको थियो ।

तत्काल नेपाली सेना, नेपाल प्रहरी, सशस्त्र प्रहरी बल, अग्नि नियन्त्रकलगायत नेपाल नागरिक उड्डयन प्राधिकरणको संयुक्त सहकार्यमा विमानमा लागेको आगो नियन्त्रणमा लिएका थिए ।

विमान पूर्णरूपमा जलेर नष्ट भएको छ । 

साथै दुर्घटनामा घाइते भएका विमानका क्याप्टेन मनीषरत्न शाक्यको काठमाडौं मेडिकल कलेज सिनामंगलमा उपचार भइरहेको छ ।