सामग्री खोज्नुहोस्

एजेन्सी । आईसीसी टि–२० विश्वकप क्रिकेट २०२४ अन्तर्गत गएराति सम्पन्न खेलमा भारतले बङ्गलादेशलाई पराजित गरेको छ ।

एन्टीगुवामा भएको खेलमा भारतले दिएको १ सय ९७ रनको लक्ष्य पछ्याएको बङ्गलादेशले निर्धारित २० ओभरमा ८ विकेटको क्षतिमा १ सय ४६ रन मात्रै बनायो ।

बङ्गलादेशका कप्तान नाज्मुल हसन शान्टोले ३२ बलमा एक चौका र तीन छक्कासहित सर्वाधिक ४० रन बनाएभने तान्जिद हसनले २९ तथा ऋषाद होसेनले २४ रन जोडे ।

भारतका लागि कुलदीप यादवले तीन तथा अर्शदीप सिंह र जसपृत बुम्राहले समान २/२ विकेट लिए । हार्दिक पान्ड्यले एक विकेट लिए ।

त्यसअघि टस हारेर पहिला ब्याटिङ गरेको भारतले निर्धारित २० ओभरमा पाँच विकेटको क्षतिमा १ सय ९६ रनको योगफल बनाएको थियो ।

भारतका लागि हार्दिक पान्ड्यले २७ बलमा चार चौका र तीन छक्कासहित सर्वाधिक ५० रन बनाए ।

त्यसैगरी विराट कोहलीले ३७, ऋषभ पन्तले ३६, शिभम दुबेले ३४ तथा कप्तान रोहित शर्माले २३ रन जोडे ।

बङ्गलादेशका तान्जिम हसन सकिब र ऋषाद हुसेनले समान २/२ विकेट लिए भने शाकिब अल हसनले एक विकेट लिएका थिए ।