सामग्री खोज्नुहोस्

एजेन्सी । जापान, दक्षिण कोरिया र चीनका शीर्ष नेताबीच पाँच वर्षपछि क्षेत्रीय स्थिरताका विषयमा छलफल भएको छ ।

जापानका प्रधानमन्त्री फुमियो किशिदा, दक्षिण कोरियाका राष्ट्रपति युन सुक योेल र चीनका प्रधानमन्त्री ली कियाङ करिब पाँच वर्षपछि पहिलोपटक त्रिपक्षीय वार्ताका लागि सियोलमा भेला भएका हुन् ।

वार्ताको एजेन्डामा उत्तर कोरिया आधिकारिक रुपमा नभए पनि किशिदाले बैठकपछि भने, ‘तीनै देशले आणविक निःशस्त्रीकरण आफ्नो साझा हितमा हुने पुष्टि गरेका छन् ।’

वार्ता हुनुभन्दा केही घण्टाअघि उत्तर कोरियाले अर्को जासुसी उपग्रह अन्तरिक्षमा पठाउने योजना बनाएको घोषणा गरेको थियो । यसले ब्यालेस्टिक प्रविधिको प्रयोग गरेर परीक्षण गर्नबाट रोक्ने संयुक्त राष्ट्रसङ्घको प्रतिबन्धको उल्लङ्घन गर्नेछ ।

युन र किशिदाले प्योङयाङलाई यो प्रक्षेपण रद्द गर्न आग्रह गरेका थिए भने दक्षिण कोरियाली नेताले यसले क्षेत्रीय र विश्वव्यापी शान्ति र स्थिरतालाई कमजोर पार्ने बताएका थिए ।