सामग्री खोज्नुहोस्

टोकियो। जापानमा पछिल्लो समय गैरकानूनी रुपमा काम गर्ने बिदेशीहरुको संख्या बढ्दो क्रममा रहेको अध्यागमनले उल्लेख गरेको छ।

जापानको कानून मन्त्रालय अन्तर्गतको अध्यागमन बिभागले आज बिहान सूचना सार्वजनिक गर्दै यो वर्षको जनवरी महिना सम्ममा गैर कानूनी रुपमा काम गर्ने बिदेशीहरुको संख्या ७९ हजार ११३ पुगेको जनाएको हो।

अघिल्लो बर्ष सोही अबधीको तुलनामा ८ हजार ६२२ जना गैरकानूनी रुपमा काम गर्ने बिदेशीहरु संख्या बढेको अध्यागमन बिभागले जनाएको छ। यसको नियन्त्रणका लागि बिध्यमान नीतिहरुमा परिमार्जन गर्ने निर्णय भएको अध्यागमन बिभागले जनाएको छ।

राष्ट्रिय प्रहरी एजेन्सी, कानून मन्त्रालय अन्तर्गतको आपराधिक मामिला ब्यूरो, सामुदायिक सुरक्षा ब्यूरो, अध्यागमन बिभाग श्रम मन्त्रालय अन्तगरको श्रम मापदण्ड ब्यूरो र रोजगार सुरक्षा ब्यूरोबीच एक आपसमा सहकार्य गर्ने अध्यागमनको सुचनामा उल्लेख गरिएको छ।

परिमार्जित कानून अनुसार अबैध रुपमा काम गर्ने र गराउने दुवै पक्षलाइ कारवाही हुने उल्लेख गरिएको छ। शरणार्थी आबेदन दिएर अबैध रुपमा काम गर्ने, नक्कली निवास कार्डको प्रयोग जस्ता कार्यको नियन्त्रणका लागि कम्पनीको दर्ता खारेजी सम्म गर्ने गरी जापान सरकारले नया नीति सार्बजनिक गरेको छ।

गैर कानूनी रुपमा श्रम गर्ने र गराउनेहरु बिरुद्द कठोर रुपमा उत्रिन फरक फरक निकायहरुबीच सूचना आदानप्रदान गर्न लागिएको पनि अध्यागमनको उक्त सूचनामा उल्लेख गरिएको छ।

स्टाटस बेगरको काम गर्ने, तोकिएको समय भन्दा धेरै काम गर्ने गराउने, रेसिडेण्ट कार्डको बैधानिकता चेक नगरी काम गराउने, अध्यागमनले स्वीकृत गरेको बाहेकको काम गर्ने लगायतलाइ गैरकानूनी श्रमका रुपमा परिभाषित गरिएको अध्यागमन बिभागको वेब साइटमा जारी गरिएको विवरणमा उल्लेख गरिएको छ।