सामग्री खोज्नुहोस्

टोकियो । जापानका परराष्ट्रमन्त्री खामिखावा योकोले नेपाल भ्रमणा गर्ने भएकी छन् । जापानको विदेश मन्त्रालयले अप्रिल २६ तारिख एक सूचना जारी गर्दै खामिखावाले आगामी मे ५ तारिख नेपाल भ्रमण गर्न लागेको जानकारी दिएको हो।

अप्रिल २६ बाट विदेश भ्रमणामा निस्किएकी परराष्ट्रमन्त्री खामिखावा मे ४ तारिख श्रीलंकाको राजधानी कोलम्बो पुग्ने कार्यतालिका रहेको छ । श्रीलंकामा १ दिन बिताए पश्चात ५ तारिख नेपालको राजधानी काठमाडौँमा अवतरण गर्ने विदेश मन्त्रालयको सूचनामा उल्लेख छ ।

काठमाडौँमा रहँदा परराष्ट्रमन्त्री खामिखावाले आफ्ना समकक्षी नारायणकाजी श्रेष्ठसँग भेटवर्ता गर्ने कार्यक्रम तय भएको छ । भेटका क्रममा नेपाल र जापानबीच कूटनीतिक सम्बन्ध स्थापना भएको ७० वर्ष पुग्न लागेको बिषय र दुइदेशबीचको सम्बन्ध सुदृढ गर्ने विषयमा कुराकानी हुने सूचनामा उल्लेख छ ।

परराष्ट्रमन्त्रीसँगको भेटवार्ता लगत्तै खामिखावा सोही दिन नेपालको राजधानी काठमाडौँबाट टोकियो फर्कने विदेश मन्त्रालयको सूचनामा उल्लेख गरिएको छ । जापानका तर्फबाट नेपालमा हालसम्म भएको उच्चस्तरीय भ्रमण सन् २००० मा जापानका तत्कालिन प्रधानमन्त्री योसिरो मोरीको रहेको छ ।

यसपछि सन् २०१९ मा जापानका तत्कालिन परराष्ट्रमन्त्री कोउनो तारोउको नेपाल भ्रमण पछिल्लो समय भएको मन्त्रीस्तरीय भ्रमण थियो। ।