सामग्री खोज्नुहोस्

टोकियो । जापानमा आइतबार दुई सैन्य हेलिकप्टर एकआपसमा ठोक्किएर दुर्घटना हुँदा एक जनाको मृत्यु भएको छ । साथै अन्य सात जना घाइते भएका अधिकारीहरूले बताएका छन् ।

जापानको आत्मरक्षा बल (सेल्फ डिफेन्स फोर्स, एसडिएफ)का प्रवक्ताले घटनाको पुष्टि गर्दै एक जनाको उद्धार गरिए पनि पछि उनको मृत्यु भएको बताए ।

‘उद्धारकर्मीहरूले समुद्रमा विमानको भाग भएको मानिएको कुरा भेट्टाएका छन् र हामीले दुई वटा हेलिकप्टर दुर्घटनाग्रस्त भएको विश्वास गरेका छौं’, रक्षामन्त्री मिनोरु किहाराले पत्रकारहरूसँग भने, ‘अहिले यसको कारण थाहा भएको छैन तर सबैभन्दा पहिला हामी मानिसहरूको उद्धारका लागि प्रयास गर्नेछौं ।’

धेरै घन्टापछि उद्धार गरिएका चालक दलका सदस्यको मृत्युको पुष्टि भएको उनले बताए । ‘मन्त्रालयले एक अर्काको नजिकका स्थानहरूमा उडान रेकर्डरको खोजी गरेको छ र दुवै हेलिकप्टर ठोक्किएको हुनसक्ने धेरै सम्भावना छ’, मन्त्री किहाराले भने ।

हेलिकप्टर प्रशान्त महासागरमा इजु टापु समूह नजिकै रातिको समयमा पनडुब्बीहरूको सामना गर्ने प्रशिक्षणका क्रममा दुर्घटना भएको देखिएको अधिकारीहरूले बताएका छन् ।