सामग्री खोज्नुहोस्

टोकियो । यस वर्षको माध्यमिक शिक्षा परीक्षा (एसईई) बिहीबारबाट शुरू भएको छ ।

राष्ट्रिय परीक्षा बोर्डले जापानमा एक परीक्षा केन्द्र निर्धारण गरेको छ । उक्त परीक्षा केन्द्रबाट २३ जना विद्यार्थीले एसईई परीक्षा दिँदैछन् ।

जापानमा रहेका नेपाली विद्यार्थीको सहजताका लागि यसवर्ष पनि जापानबाटै परीक्षा दिन पाउने व्यवस्था गरिएको बोर्डले जनाएको छ ।

यसैबीच चैत २७ गतेसम्म चल्ने परीक्षा परीक्षाका लागि नेपालभर २ हजार ५७ परीक्षा केन्द्र निर्धारण गरिएको छ ।

जसमा देशभरबाट करिब पाँच लाख विद्यार्थी एसईई परीक्षामा सहभागी छन् ।

विगतमा सैद्धान्तिक र प्रयोगात्मक दुवै जोडेर ३५ प्रतिशत ल्याउनुपर्ने व्यवस्था रहेकामा यसवर्ष निर्देशिका कार्यान्वयनमा आएपछि पहिलोपटक बोर्डले एसईई परीक्षाको नतिजामा विद्यार्थीले सैद्धान्तिकमा ३५ र प्रयोगात्मकमा ४० अङ्क ल्याउनुपर्ने व्यवस्था गरेको छ ।

परीक्षार्थी कम्तीमा सैद्धान्तिक विषयमा ३५ र प्रयोगात्मकमा ४० अङ्क ल्याउनुपर्ने भन्दै एक सय पूर्णाङ्क रहेको विषयमा ३५ अङ्क र ७५ पूर्णाङ्क रहेको विषयमा २७ अङ्क ल्याउनुपर्ने छ ।

३५ प्रतिशतभन्दा कम अङ्क ल्याएमा कक्षा ११ मा भर्ना हुन नपाउने र पुनःमौका परीक्षामा सहभागी हुनुपर्नेछ ।

३५ अङ्क ल्याउन नसक्ने विद्यार्थीले पहिलो वर्ष दुई विषयको मौका परीक्षा दिन पाउने व्यवस्था गरिएको छ ।