सामग्री खोज्नुहोस्

काठमाडौं । आइसीसी क्रिकेट विश्वकप लिग २ अन्तर्गत आज भएको खेलमा नेपालले नेदरल्याण्ड्सलाई नौ विकेटले पराजित गरेको छ ।

कीर्तिपुरस्थित त्रिवि क्रिकेट मैदानमा टस हारेर पहिले ब्याटिङ गरेको नेदरल्याण्ड्सले ३९ ओभरमा सबै विकेट गुमाउँदै १ सय ३७ रनमा सीमित भयो ।

नेदरल्याण्ड्सलाई सस्तैमा समेट्ने क्रममा कुशल भुर्तेलले ४ विकेट लिए भने ललित राजवंशीले २ विकेट लिए । साथै कप्तान रोहित पौडेल र सोमपाल कामीले १/१ विकेट लिए । नेदरल्याण्ड्सका २ ब्याटर रनआउट भए ।

नेदरल्याण्ड्सको पारीको सुरूवात राम्रो भएन । चार रनमा पहिलो विकेट गुमाएको उसले १८ रनमा दोस्रो विकेट गुमायो । साथै ५६ रन छँदा नेदरल्याण्ड्सले तेस्रो, ६७ रनमा चौथो ९७ रनमा पाँचौं, ९९ रनमा छैटौं, एक सय एक रनमा सातौं र एक सय २२ रनमा आठौं विकेट गुमायो ।

त्यसैगरी एक सय २७ रनमा नवौं र एक सय ३७ रनमा अन्तिम विकेट गुमायो । उसका लागि कप्तान स्टक एड्वार्डसले सर्वाधिक ३३ रन बनाए भने साइब्राण्ड एंगलब्रेक्टले २३ र बास डे लिडेले २७ रनको योगदान दिए ।

एक सय ३८ रनको लक्ष्य नेपालले १५ दशमलव २ ओभरमा एक विकेटको क्षतिमा पूरा गर्‍यो । नेपालका लागि ओपनर कुशल भुर्तेलले २८ रन बनाए भने आशिफ शेख र अनिल साहले अर्धशतकीय पारी खेले । आशिफले ५४ रन र साहले ५७ रनको योगदान दिए ।

नेदरल्याण्ड्सका भिभिआन किङ्माले एक विकेट लिए ।

जारी प्रतियोगिताको पहिलो खेलमा नामिबियासँग चार विकेटले पराजित भएको नेपाल आजको खेलमा नेदरल्याण्ड्समाथि जीत निकाल्दै २ अङ्क जोडेको छ ।