सामग्री खोज्नुहोस्

टोकियो । विगत ७ वर्षदेखि जापानका विभिन्न फुटबल प्रतियोगितामा सहभागिता जनाउँदै आएको बेनी एफसी जापानले सेरेजो ओसाकासँग मैत्रीपूर्ण फुटबल खेल्ने भएको छ ।

जापानको व्यावसायिक फुटबल (जी) लिग खेल्ने सेरेजो ओसाकासँग मैत्रीपूर्ण खेल खेल्न पाउनु एक महत्त्वपूर्ण अवसर भएको बेनी एफसीले जनाएको छ ।

बेनी एफसी र सेरेजो ओसाकाबीचको मैत्रीपूर्ण फुटबल खेल यही फेब्रुअरी १८ तारिक ओसाकामा हुनेछ ।

बेनी एफसीलाई हौसला दिन र खेल हेर्नको लागि ओसाकामा बस्ने सम्पूर्ण नेपालीहरूलाई उपस्थितिको लागि आयोजक सेरेजो ओसाकाले आग्रह गरेको छ ।

‘विदेशको ठाउँ, नयाँ व्यक्ति अनि धेरै चुनौतीका बीच निरन्तर जापानका धेरै प्रतियोगितामा आफूलाई सामेल गराउनु त्यति सहज छैन’, बेनी एफसले भनेको छ, ‘निरन्तरको सङ्घर्ष र मेहनतका बीच अहिले यो अवसर प्राप्त भएको छ ।’

जापानका विभिन्न नेपाली क्लबहरूबीचको यो अवसर अत्यन्त ठूलो उपलब्धिको रूपमा लिएको बेनी एफसीले जनाएको छ ।

मैत्रीपूर्ण खेलमा राम्रो प्रदर्शन गरेका बेनीका खेलाडीलाई सेरेजो ओसाकाले आफ्नो क्लबमा राख्ने बेनी एफसीका मेनेजर मनोज बानियाँले ​जानकारी दिए ।