सामग्री खोज्नुहोस्

टोकियो । जापानको प्रमुख ढुवानी कम्पनी यामातोले यसैबर्षको अप्रिल महिनादेखि हवाई सेवामार्फत ढुवानी सेवा प्रदान गर्ने भएको छ।

जापान एयर लाइन्ससँगको सहकार्यमा हवाईमार्फत ढुवानी गर्ने घोषणा गरेको यामातोले खरिद गरेको विमान नारिता विमानस्थलमा अवतरण गरेको हो। यामातोले क्युस्यु, होकाइदो, ओकिनावा लगायतका क्षेत्रमा सामान ढुवानी गर्ने उद्देश्यले कार्गो विमान खरिद गरेको यामातोले जनाएको छ।

हालै नारिता विमानस्थमा अवतरण गरेको उक्त कार्गो बिमानमा २८ टन सम्म सामान अट्ने कम्पनीले जनाएको छ। कम्पनीका अनुसार टोकियोका हानेदा, नारिता र होक्काइदोको न्यू चितोसे संगै किटा क्युस्यु क्षेत्रमा दैनिक २१ उडान गर्ने योजना रहेको छ ।

ट्रक चालकहरुको अभाव भएको र कम्पनीमा आबद्द ट्रक चालकहरुले धेरै ओभर टाइम गर्न पर्ने भएकाले पनि कार्गो परियोजना अघि सारिएको कम्पनीले उल्लेख गरेको छ। कार्गो बिमानको संचालन संगै सामान ढुवानीका लागि समय लाग्ने लामो दूरीका क्षेत्रमा छिटो सामान ढुवानी गर्न सकिने पनि जनाएको छ।