सामग्री खोज्नुहोस्

एजेन्सी । दक्षिण कोरियाका विपक्षी नेता ली जे–म्युङमाथि मङ्गलबार छुरा प्रहार भएको छ ।

आफ्ना समर्थक भएको बहाना गर्दै भीडमा धकेल्ने एक व्यक्तिले उनको घाँटीमा छुरा प्रहार गरेका थिए । उनको सघन उपचार कक्ष (आइसियु) मा उपचार भइरहेको उनको पार्टीले जनाएको छ ।

पत्रकारहरूले घेरिएको अवस्थामा एक व्यक्तिले लीको घाँटीको देब्रेपट्टि छुरा प्रहार गरेको बुसान प्रहरी अधिकारी सोन जे–हानले पत्रकार सम्मेलनमा बताएका बीबीसीले जनाएकाे छ ।

लीको डेमोक्रेटिक पार्टीका क्वोन चिल–सेउङले लीलाई सुरुमा बुसानको अस्पताल लगिएको र पछि राजधानी सोल लगिएको छ ।

‘गलाको आन्तरिक नसामा क्षति पुगेको पुष्टि भएको छ’, उनले भने, ‘शल्यक्रियापछि ली होशमा हुनुहुन्थ्यो, हाल आइसियुमा भर्ना हुनुभएको छ र सुधार भइरहेको छ ।’

आक्रमणकारीलाई घटनास्थलबाटै पक्राउ गरिएको छ ।

प्रहरी अधिकारी सोनका अनुसार ६० वर्षीय आक्रमणकारीले १३ सेन्टिमिटर लामो ब्लेड भएको १८ सेन्टिमिटर छुरा प्रयोग गर्दथे र यसलाई उनले अनलाइनमा खरिद गरेका थिए ।