सामग्री खोज्नुहोस्

टोकियो । जापानमा मादक पदार्थ सेवन (मापसे) गरेर सवारी साधन चलाएको आरोपमा एक नेपाली पक्राउ परेका छन् । पक्राउ पर्नेमा २६ वर्षीय युवक छन् ।

जापानको निगाता प्रिफेक्चरको जोयत्सु सहरमा उनलाई प्रहरीले सवारी चालक अनुमतिपत्र (लाइसेन्स) नभई गाडी चलाएको आरोपमा पक्राउ गरेको हो ।

गत आइतबार राति करिब ८ः१५ बजे जोयत्सु सिटीको हिगाशिहोनमाची ३–चोमेस्थित सिटी रोडमा सवार उनी रेलसँग ठोक्किएका थिए ।

रेलसँग गाडी ठोक्किर दुर्घटनामा परेपछि नजिकैका एक व्यक्तिले प्रहरीलाई खबर गरेका थिए ।

त्यसपछि घटनास्थलमा पुगेका एक प्रहरी अधिकारीले ड्राइभिङ लाइसेन्स देखाउन आग्रह गरेका थिए । तर उनले अस्वीकार गरे । त्यसपछि उनलाई प्रहरीले घटनास्थलमै पक्राउ गरेको थियो ।

पक्राउ परेका ती व्यक्तिले मापसे गरी सवारी चलाएको र लाइसेन्स पेस गर्नुपर्ने शर्त उल्लंघन गरेको स्वीकार गरेका छन् ।

प्रहरीका अनुसार उनले लाइसेन्स लिएको कुनै प्रमाण भेटिएको छैन । थप अनुसन्धान भइरहेको प्रहरीले जनाएको छ ।