सामग्री खोज्नुहोस्

टाेकियाे । अनेसास जापान च्याप्टरको १३ औं अधिवेशन तथा ६७ औं नियमित साहित्य शृङ्खला सम्पन्न भएको छ।

जापानको राजधानी टोकियोमा सम्पन्न अधिवेशनले (सन् २०२३–२०२५) का लागि अरुण पौडेलको नेतृत्वमा नयाँ कार्यसमिति चयन गरेको छ।

संस्थाका अध्यक्ष रविन शर्माको अध्यक्षता तथा जापानका लागि नेपाली राजदूत महामहिम डा. दूर्गाबहादुर सुवेदी क्षेत्रीको प्रमुख आतिथ्यतामा सम्पन्न अधिवेशनले वरिष्ठ उपाध्यक्षमा आनन्द अधिकारीसहित उपाध्यक्षमा दीपा घिमिरे र शरद पोख्रेललाई निर्विरोध निर्वाचित गरेको छ ।

यस्तै, महासचिवमा अनिलकुमार निर्दोष निर्वाचित भएका छन् भने कोषाध्यक्षमा मञ्जु गिरी वन र सहकोषाध्यक्षमा सरिता चौधरी निर्वाचित भएका छन् ।

अधिवेशनबाट सचिवमा केबी पारखी, मनोज मौसम केसी र संगिता कुँवर निर्वाचित बनेका छन् । 

यस्तै, सदस्यहरूमा नारायण पोख्रेल, सरोज घिमिरे, बिनिशा सापकोटा, सुरज हुक्पा चोङ्वाङ, भगवती क्षेत्री, सुविन न्यौपाने, यमलाल कँडेल, केशव ज्ञवाली, प्रेम पौडेल निर्वाचित बनेका छन् ।

नयाँ कार्यसमितिको पहिलो बैठकले दुई जना सदस्य मनोनयन गर्ने संस्थाका संरक्षक तथा निर्वाचन समितिका संयोजक दिनेशराज ज्ञवालीले जानकारी दिए ।

कार्यक्रममा उपस्थित दर्जन बढी सर्जकहरूले आ–आफ्ना रचना वाचन गरेका थिए । संस्थाका संरक्षक तथा निवर्तमान केन्द्रीय अध्यक्ष प्रकाश पौडेल माइलाले अनेसास जापानको विगत, वर्तमान र भविष्य विषयमा आफ्नो धारणा राखेका थिए ।

पूर्वअध्यक्ष आलोक चालिसे, पूर्वअध्यक्ष तथा बिओटी उपसभापति विष्णुप्रसाद घिमिरे, पूर्वअध्यक्ष तथा केन्द्रीय सचिव दीप पाठक, पूर्वअध्यक्ष गिरिजा गैह्रे लगायतले आ–आफ्ना रचना वाचनसहित पुरानो कार्यसमितिलाई सफलतापूर्वक कार्यकाल सम्पन्न गरेकामा हार्दिक बधाई दिँदै नयाँ कार्यसमितिलाई सफलताको शुभकामना व्यक्त गरेका थिए ।

संस्थाको १३ औं अधिवेशनको अवसर पारेर नेपाली पत्रकारिताका माध्यमबाट अनेसासलाई विभिन्न तरिकाले सहयोग पुर्‍याउने जापानमा क्रियाशील पत्रकारहरूलाई कदरपत्रले सम्मान गरिएको थियो।

करिब ६ घण्टासम्म चलेको कार्यक्रममा १०० भन्दा बढी साहित्यप्रेमीहरूको उपस्थिति रहेको थियो भने कार्यक्रमको सहजीकरण शरद पोख्रेलले गरेका थिए।