सामग्री खोज्नुहोस्

काठमाडौं । जाजरकोट भूकम्पमा परी मृत्यु हुनेको सङ्ख्या १ सय १ कायम भएको छ । यसअघि प्रहरीले जाजरकोटमा मात्र १ सय ५ जनाको मृत्यु भएको जानकारी दिएको थियो ।

तर जाजरकोटको नलगाड नगरपालिकाका ३ जनाको ठेगाना फरक परेको र अर्को एक जनाको नागरिकता र बोलाउने नाम छुट्टाछुट्टै रहेकाले मृत्यु हुनेको संख्या घटेको प्रहरीले जनाएको छ ।

यसअघि नलगाड नगरपालिकामा ५५ जनाको मृत्यु भएको तथ्याङ्क प्रहरीले दिएको थियो ।

अहिले नलगाडमा ५१ जनाको मृत्यु भएको संख्या यकिन भएको छ ।

प्रहरीका अनुसार नलगाड नगरपालिका–८ की सरिता सिंह, नलगाड–७ का रेगम सिंह, नलगाड–१२ की मीना विष्टको नाम दोहोरिएको थियो ।

टेकबहादुर पुन व्यक्ति एउटा मात्र रहेका तर नाम दुई स्थानमा उल्लेख हुँदा सङ्ख्या दोहोरिएको थियो ।

जाजरकोटको भेरी नगरपालिकामा ४२ जनाको मृत्यु भएको छ । त्यसमध्ये २८ महिला र १४ पुरुष छन् ।

जाजरकोटकै नलगाड नगरपालिकामा ५१, कुशे गाउँपालिकामा सात र छेडागाड नगरपालिकामा एकजना गरी एक सय एकजनाको मृत्यु भएको हो ।

त्यस्तै रुकुम पश्चिममा ५२ जनाको मृत्यु भएको छ ।

दुवै जिल्लामा गरेर ज्यान गुमाउनेको सङ्ख्या जम्मा १ सय ५३ मात्र निश्चित भएको जाजरकोटका प्रमुख जिल्ला अधिकारी सुरेश सुनारले जानकारी दिए ।