सामग्री खोज्नुहोस्

काठमाडौं । हमासको आक्रमणबाट इजरायलमा मृत्यु भएका १० नेपाली विद्यार्थीको शव नेपाल आइपुगेको छ ।

परराष्ट्र मन्त्रालयका अनुसार शनिबार फ्लाइ दुवईको विमानमार्फत डोटीका पदम थापाको शव नेपाल आइपुगेसँगै मृत्यु भएका सबै नेपाली विद्यार्थीको शव नेपाल आइपुगेको हो ।

‘इजरायलमा हमास समूहको आक्रमणमा परी मृत्यु भएका १० विद्यार्थीको शव नेपाल ल्याइएको छ । इजरायलमा हाललाई उद्धार कार्य करिब करिब सकिएको छ । बेपत्ता भएका विपीन जोशीको उद्धारका लागि पहल भइरहेको छ’ मन्त्रालयद्वारा जारी विज्ञप्तिमा भनिएको छ ।

गत असोज २० गते हमास समूहको आक्रमणमा दक्षिणी इजरायलमा १० जना नेपाली विद्यार्थीको मृत्यु भएको थियो ।

आक्रमणमा परी डोटी लामीखाल ८ का पदम थापा, सल्यान सारदा ३ का प्रवेश भण्डारी, बझाङ जयपृथ्वी ६ का गणेशकुमार नेपाली, दार्चुला मालिकार्जन ४ का लोकेन्द्रसिंह धामी, दार्चुला लेकम ५ का दीपेशराज विष्ट, धनुषा सापही ६ का आनन्द शाह, कैलाली घोडाघोडी ४ का नारायणप्रसाद न्यौपाने, सुनसरी मधुवन १ का राजेशकुमार स्वर्णकार, डोटी पचनाली ३ का राजन फुलारा, तथा कैलाली बौनियाँ ३ का आशीष चौधरीको शव नेपाल ल्याइएको हो ।

सुदूरपश्चिम विश्वविद्यालयको कृषि क्षेत्रको ‘लर्न एण्ड अर्न’ कार्यक्रमअन्तर्गत उनीहरु इजरायल गएका थिए ।

सोही आक्रमणमा परी कञ्चनपुर भीमदत्त ३ का विपीन जोशी सम्पर्कविहीन छन् ।

जोशीको सकुशल रिहाइको माग गर्दै प्रदर्शन

हमासको नियन्त्रणमा रहेको भनिएका कञ्चनपुरको भीमदत्त नगरपालिका–३ का विपीन जोशीको सकुशल रिहाइको माग गर्दै आइतबार महेन्द्रनगरमा प्रदर्शन गरिएको छ ।

विपीनका परिवारसँगै आफन्तले जोशीको रिहाइका लागि माग गर्दै कञ्चनपुरका प्रमुख जिल्ला अधिकारीमार्फत परराष्ट्रमन्त्रीलाई ज्ञापनपत्र बुझाएका छन् ।

इजरायली सरकारले विपीन हमास समूहको नियन्त्रणमा रहेको पुष्टि गरेपछि उनको परिवारमा केही आशा पलाएको छ । विपीनका बुबा महानन्द जोशीले आफ्नो छोरालाई सकुशल नेपाल फर्किने वातावरण मिलाउन सरकारसँग आग्रह गरेका छन् ।