सामग्री खोज्नुहोस्

काठमाडौं । गैरआवासीय नेपाली संघ(एनआरएनए)को विश्व सम्मेलन एवं ११औं अन्तर्राष्ट्रिय महाधिवेशन काठमाडौंमा सुरु भएको छ ।

कात्तिक ३ गतेसम्म चल्ने सम्मेलनको राष्ट्रपति रामचन्द्र पौडेलले उद्घाटन गर्नेछन् भने कात्तिक ३ गते प्रधानमन्त्री पुष्पकमल दाहाल ‘प्रचण्ड’ले समापन गर्नेछन् ।

११औं महाधिवेशनलाई २०औं वर्षगाठ अवसरका रुपमासमेत मनाउन लागिएको एनआरएनएले जनाएको छ ।

एनआरएनएका अनुसार सम्मेलनमा असोज ३० र कात्तिक १ गते विश्व ज्ञान सम्मेलन, युवा र महिला सम्मेलन, वैदेशिक रोजगार तथा सामाजिक सुरक्षा कोष एवं नागरिकता ऐन तथा मताधिकार सम्बन्धमा विशेष सत्रको आयोजना गरिनेछ ।

यस्तै, कत्तिक २ गते एनआरएनएको नयाँ नेतृत्वका लागि निर्वाचन हुनेछ । एनआरएनएको अध्यक्षका लागि ४ जनाले प्रतिस्पर्धा गर्दैछन् ।

डा. बद्री केसी (रसिया), महेशकुमार श्रेष्ठ (जापान), रविना थापा (अमेरिका) र रवीन्द्रकुमार शर्मा (कतार)ले अध्यक्षका लागि उम्मेदवारी दर्ता गराएका छन् ।
महाधिवेशनले कुल ७४ जना अन्तर्राष्ट्रिय समन्वय परिषद्का पदाधिकारी निर्वाचित गर्ने एनआरएनएले जनाएको छ ।