सामग्री खोज्नुहोस्

काठमाडौं । वैदेशिक रोजगारका लागि जापान पठाइदिने भन्दै ठगी गरेको आरोपमा २ जना पक्राउ परेका छन्।

पक्राउ पर्नेमा खोटाङ घर भई काठमाडौं महानगरपालिका २९ घट्टेकुलो बस्ने ४५ वर्षीय राजकुमार गुरूङ र सुनसरी घर भई घट्टेकुलो बस्ने २८ वर्षीय उदय गुरूङ रहेका छन् ।

उनीहरूलाई काठमाडौं उपत्यका अपराध अनुसन्धान कार्यालयको टोलीले मंगलबार पक्राउ गरेको एसपी रवीन्द्र रेग्मीले जानकारी दिए।

एसपी रेग्मीका अनुसार उनीहरूले वैदेशिक रोजगारीका लागि जापान पठाइदिने भन्दै पटक–पटक गरी पीडितबाट २ लाख ७० हजार रुपैयाँ ठगी गरेका थिए । साथै उनीहरूले जापान जानका लागि १५ लाख रूपैयाँ भए पुग्ने बताएका थिए।

जापानमा कुकको काम लगाइदिने र मासिक एक लाख रुपैयाँ बराबरको तलब हुने भनेर पीडितलाई प्रलोभनमा पारेर उनीहरूले ठगी गरेको प्रहरीले जनाएको छ ।

पीडितबाट रकम लिएर सम्पर्कविहीन भएपछि वैदेशिक रोजगार विभागले प्रहरीलाई पत्राचार गरेको थियो।

थप अनुसन्धानका लागि उनीहरूलाई वैदेशिक रोजगार विभाग ताहाचलमा पठाइएको प्रहरीले जनाएको छ ।