सामग्री खोज्नुहोस्

एजेन्सी । एसिया कप क्रिकेटमा नेपाल भारतसँग १० विकेटले पराजित भएको छ । हारसँगै नेपाल एसिया कप क्रिकेट प्रतियोगिताबाट बाहिरिएको छ ।

श्रीलंकाको पालेकेले क्रिकेट रंगशालामा टस हारेर पहिले ब्याटिङमा उत्रेको नेपालले ४८ दशमलव दुई ओभरमा सवै विकेट गुमाएर दुई सय ३० रन बनाएको थियो ।

दुई सय ३१ रनको विजयी लक्ष्य पछ्याउने क्रममा खेलमा बर्षा बाधक बनेपछि निर्धारित ५० ओभरको खेललाई छोटयाएर २३ ओभरमा झारिएको थियो । त्यसपछि भारतले एक सय ४५ रनको नयाँ लक्ष्य प्राप्त गरेको थियो । उक्त लक्ष्य भारतले विना कुनै विकेट २० दशमलव एक ओभरमा पूरा गर्‍यो ।

भारतका लागि कप्तान रोहित शर्माले अविजित ७४ रन तथा सुभमन गिलले अविजित ६७ रन बनाए । शर्माले ५९ बल खेल्दै पाँच छक्का र ६ चौका प्रहार गरे । यस्तै गिलले ६२ बल खेल्ने क्रममा एक छक्का र आठ चौका प्रहार गरे ।

नेपाल पहिलो खेलमा पाकिस्तानसँग २ सय ३८ रनले पराजित भएको थियो । नेपाल अंकविहीन हुँदै समूह चरणबाटै बाहिरिएको छ। समूह ‘ए’ बाट पाकिस्तान शीर्ष स्थानमा तथा भारत दोस्रो स्थानमा रहँदै सुपर फोरमा पुगेका छन् ।

समूह ‘बी’ मा श्रीलंका, बंगलादेश र अफगानिस्तान छन् ।