सामग्री खोज्नुहोस्

काठमाडौं । जापान सरकारले नेपाल क्यान्सर केयर फाउन्डेसनलाई स्तन क्यान्सर परीक्षण उपकरण प्रदान गरेको छ ।

जापान सरकारको ग्रासरुट ह्युमन सेक्युरिटी प्रोजेक्ट (जीजीपी) अनुदान सहायता अन्तर्गत ललितपुरको सातोबाटोमा रहेको फाउन्डेसनका लागि करिब ८३ लाख रुपैयाँ बराबरको स्तन क्यान्सर परीक्षण उपकरण प्रदान गरिएको हो ।

क्यान्सर परीक्षण उपकरण प्रदान गर्दै नेपालका लागि जापानी राजदूत युताका किकुताले नेपाली महिलामा हुने क्यान्सरमध्येको एक स्तन क्यान्सर जस्ता रोग निको पार्न प्रारम्भिक पहिचान र उपचार महत्वपूर्ण हुने बताएका थिए ।

यस परियोजनाले प्रारम्भिक चरणमा स्तन क्यान्सर पत्ता लगाउन र नेपालमा व्यक्ति, परिवार र समुदायको स्वास्थ्य र जीवनस्तरमा सुधार ल्याउन मद्दत गर्ने उनको भनाइ थियो । साथै यो परियोजनाले नेपाल र जापानबीचको मित्रतालाई अझ प्रगाढ बनाउने उनको विश्वास थियो ।

२०११ मा स्थापित नेपाल क्यान्सर केयर फाउन्डेशनले मुख्यतया स्तन र पाठेघरको क्यान्सरको लागि स्क्रीनिंग र परामर्श सेवाहरू प्रदान गर्दैआएको छ ।