सामग्री खोज्नुहोस्

टाेकियाे । जापानको नारितामा ‘सेकेण्ड डाइमण्ड कप’ फुटसल प्रतियोगिता हुने भएको छ । ‘स्वस्थ्यको लागि खेलकुद, राष्ट्रको लागि खेलकुद’ मूल नाराका साथ ‘नेपाली राष्ट्रिय महिला फुटबल टिमलाई सहयोगार्थ’ आयोजना हुने प्रतियोगिता चिबाको नारितामा हुनेछ ।

आगामी अगस्ट २७ मा हुने उक्त प्रतियोगितामा जापानका विभिन्न क्षेत्रबाट ३० भन्दा बढी टिमको सहभागिता हुने खेल संयोजक मदन राईले जानकारी दिए ।

संयोजक राईका अनुसार प्रतियोगितामा प्रथम हुनेले ५ लाख ११ हजार १११ जापानी येन, ट्रफी, मेडल र प्रमाणपत्र प्राप्त गर्नेछ । यस्तै, दोस्रो र तेस्रो हुनेले क्रमशः २ लाख २२ हजार २२२ र १ लाख जापानी येनका साथमा ट्रफी, मेडल र प्रमाणपत्र प्राप्त गर्नेछन् ।

यस्तै, उत्कृष्ट खेलाडीलाई ५ हजार जापानी येन र ट्रफी प्रदान गरिने आयोजकले जनाएको छ ।

आयोजकका अनुसार प्रतियोगितामा भाग लिनका लागि ४१ हजार येन प्रवेश शुल्क निर्धारण गरिएको छ ।

नेपाली राष्ट्रिय महिला फुटबल टिमलाई थप उर्जा र हौसला प्रदान गर्नका लागि विदेशी भूमिमा पनि बृहत फुटसल प्रतियोगिता गर्न लागिएको खेल इभेन्टर करण क्षेत्रीले जानकारी दिए ।

नेपाली राष्ट्रिय महिला फुटबल टिमको लागि जापानबाट एक दशकपछि यस्तो प्रतियोगिताको आयोजना गरिएको हो । प्रतियोगिताको लागि जापानमा रहेका नेपाली फुटसल टिमहरूलाई सहभागिताका लागि आह्वान गरिएको छ ।

जापानमा रहेका विभिन्न व्यावसायिक तथा सामाजिक संस्थाहरूको सहयोगमा आयोजना हुन लागेको प्रतियोगिताको मिडिया पार्टनर क्योउदाई न्यूज डटकम रहेको छ ।