सामग्री खोज्नुहोस्

एजेन्सी । फ्रान्समा किशोरको हत्या भएको विरोधमा प्रदर्शन गर्ने कम्तीमा १५० जना पक्राउ परेका छन् । विरोधमा आधा दर्जनभन्दा बढी सहरमा आगजनी, तोडफोड र हिंसात्मक प्रदर्शन भएको प्रहरीले जनाएको छ ।

राजधानी पेरिसको दक्षिणी भागमा पर्ने एस्सोन क्षेत्रमा एक समूहले सबै यात्रुहरूलाई जबर्जस्ती ओरालेर बसमा आगो लगाएको र पेरिस नजिकैको क्लामामा गुडिरहेको यात्रुबाहक ट्राममा आगो लगाएका थिए ।

दक्षिणी सहर तुलुजमा थुप्रै कारहरूमा आगजनी गरिएको छ । अन्य दुई दक्षिणी सहर दिजोन र लियोनमा पनि थुप्रै सवारी साधनमा आगजनी गरिएको प्रहरी स्रोतलाई उल्लेख गर्दै फ्रान्सेली मेडियाहरुले जनाएका छन् ।

फ्रान्सको फेस्नेस्थित दोस्रो ठूलो जेल परिसरमा प्रदर्शनकारीहरूले आतिसबाजी र पटका पड्काएर प्रवेशद्वारमै रहेका सुरक्षामाथि हमला गरेका थिए । हिंसात्मक प्रदर्शनीले उग्र रुप लिएको भन्दै पेरिस उपनगर पालिका क्लामाले सोमबारसम्मका लागि कर्फ्यु लगाएको छ ।

करिब ५४ हजार जसंख्या भएको यस नगरपालिकाले बिहीबार राति आफ्नो वेभसाईटमा प्रेस विज्ञप्तिमार्फत् घोषणा गरेको हो । कर्फ्यु बिहीबार राति नौ बजेदेखि सोमबार बिहान ६ बजेसम्मका लागि लगाइएको छ ।

गत मंगलबार सुरक्षा अधिकारीका तर्फबाट एक किशोरको हत्या भएको आरोपमा बिहीबार दोस्रो पटक भएको प्रदर्शनले हिंसात्मक रुप लिएको हो । हिंसात्मक प्रदर्शन भएपछि १५० जनालाई गिरफ्तार गरिएको स्थानीय सञ्चारमाध्यमले लेखेका छन् ।